किरकोळ वादातून एका तरुणाने विवाहित मैत्रिणीची हत्या केल्याची धक्कादायक घटना घडली. गळा आवळून महिलेची हत्या केल्यानंतर तरुणाने तिचा मृतदेह कृष्णा नदीत फेकून दिला. त्यानंतर तो पोलिस ठाण्यात हजर झाला. ही घटना सांगलीच्या ईश्वरपूरमध्ये घडली. या घटनेमध्ये सांगली पोलिसांची चांगलीच धावपळ झाली. पोलिसांनी रेस्क्यू करून महिलेची दुचाकीबाहेर फाढली. महिलेचा शोध सुरू आहे. या घटनेमुळे सांगलीमध्ये खळबळ उडाली.

मिळालेल्या माहितीनुसार, वाळवा तालुक्यातील एका गावामध्ये पीडिता आपल्या दोन मुलींसह राहत होत. तिचे पती कर्नाटकात मजूरीचे काम करतात. मृत महिला खासगी रुग्णालय, खानावळ सारख्या ठिकाणी काम करून कुटुंबाचा उदरनिर्वाह करत होती. ईश्वरपूर येथे रुग्णालयात काम करत असताना तरुणाची आणि मृत महिलेची ओळख झाली. यादरम्यान या दोघांमधील मैत्री आणखी वाढत गेली.

या मैत्रीतून संशयित तरुण आणि मृत महिलेमध्ये पैशाची देवाण-घेवाण सुरू झाली होती.काही काळापासून या दोघांच्यामध्ये पैशावरून सतत वाद सुरू होते आणि या वादातून संशयित तरुणाने महिलेची हत्या केल्याची माहिती समोर आली. महत्वाचे म्हणजे, महिलेच्या हत्येनंतर आरोपी तरुणाने पोलिस ठाणे गाठले आणि हत्येची कबुली दिली. ईश्वरपूर पोलिसांनी या प्रकरणी गुन्हा दाखल करत आरोपीला अटक केली.

आरोपीने सांगितले की, गळा आवळून मैत्रिणीची हत्या केली. त्यानंतर तिचा मृतदेह पोत्यामध्ये भरून ताकारी येथील कृष्णा नदीच्या पात्रात फेकून दिला. पोलिसांनी तात्काळ घटनास्थळी धाव घेतली. नदीपात्रात शोधमोहिम सुरू केली असून महिलेचा मृतदेह शोधण्याचे काम सुरू आहे. शोध मोहिमेमध्ये मृत महिलेची दुचाकी आढळून आली आहे. या प्रकरणी ईश्वरपूर पोलिस ठाण्यामध्ये घटनेची नोंद झाली असून अधिक तपास ईश्वरपूर पोलिस करत आहेत.