समृद्धी महामार्गावरील दरोडा प्रकरणात बीड कनेक्शन समोर आलंय. मुंबई-नागपूरला जोडणाऱ्या ‘समृद्धी महामार्गवरून जाणाऱ्यांना धाक दाखवून लुटणाऱ्यांच्या म्होरक्याला पोलिसांनी बेड्या ठोकल्या आहेत. किरण अजिनाथ गायकवाड असं या मुख्य सूत्रधाराचं नाव असून त्याला बीडच्या शिरूर तालुक्यातून जेरबंद केलंय. एव्हंढच नाही तर समृद्धी महामार्गावरील चोरी प्रकरणात धाराशिवमधून 6 दरोडेखोरांनाही पोलिसांनी ताब्यात घेतलंय.

अर्जुन व्यकट पवार, वय 55

गोविंद शिवाजी पवार, वय 19

धनाजी अर्जुन पवार, वय 22

अशोक हिरामण शिंदे, वय 37

नितीन हिरामण शिंदे, वय 34

लखन भारत काळे, वय 23

या सर्व दरोडेखोरांनी समृद्धी महामार्गावर प्रवाशांकडून तब्बल 18 लाखांचा ऐवज लुटलाय. त्यामुळे समृद्धी महामार्गावरून प्रवास करणाऱ्या प्रवाशांमध्ये भीतीचं वातावरण निर्माण झालंय. केवळ सात जणांना अटक करून ही भीती दूर होणार नाही. तर याच्या मुळाशी जाऊन आणखी टोळ्या कार्यरत आहेत का याचा तपास होणं गरजेचं आहे.

मात्र, आता दरोडेखोरांच्या दहशतीनंतर समृद्धी महामार्गावर CCTV बसविण्याकरिता गॅन्ट्री उभारण्याचं काम केलं जाणार आहे. त्यामुळे वेगवान प्रवासासाठी ओळखल्या जाणाऱ्या या महामार्गावर रात्रीच्या वेळी वाहन चालवणाऱ्या प्रवाशांना दिलासा मिळण्याची शक्यता आहे. त्यामुळे कोट्यवधी रुपये खर्चून बांधलेल्या समृद्धीसह अन्यही महामार्गांवर सुरक्षेसाठी कडक उपाययोजना करणं गरजेचं आहे. अन्यथा समृद्धीसारखी लूट दुसऱ्या कुठल्या तरी मार्गावर सुरू होण्याची शक्यता नाकारता येत नाही.