रामू ढाकणे 

छत्रपती संभाजीनगर  : छत्रपती संभाजीनगर जिल्ह्यातील काही भागासह मराठवाड्यात आठही जिल्ह्यात मुसळधार पाऊस झाला आहे. मराठवाड्यातील २८ महसूल मंडळात अतिवृष्टी झाली आहे. या मंडळातील साधारण ५६० गावांना अतिवृष्टीचा तडाखा बसला असून शेतकऱ्यांचे मोठे नुकसान झाले आहे. तर विजांच्या कडकडाटासह झालेल्या मुसळधार पावसात जीवितहानी देखील झाली आहे. 

राज्यात मागील काही दिवसांपासून (Rain) पाऊस सुरु आहे. काही भागात जोरदार हजेरी लावली असून काही भागात मात्र अजूनही पावसाची प्रतीक्षा आहे. दरम्यान मराठवाड्याच्या अनेक भागात पावसानाने अक्षरशः झोडपून काढले आहे. यात संभाजीनगर, जालना, बीड, लातूर, धाराशिव, नांदेड, परभणी आणि हिंगोली जिल्ह्यातील काही मंडळाचा यात समावेश असून जवळपास ५६० गावे या जोरदार पावसामुळे चिंब झाली. तर (Sambhajinagar) संभाजीनगर जिल्ह्यातील ३ मंडळात अतिवृष्टी झाली आहे. 

पेरणीच्या दृष्टीने हा पाऊस समाधानकारक असला तरी देखील विभागातील लघु, मध्यम आणि मोठ्या प्रकल्पांना अद्याप मोठ्या (Heavy Rain) पावसाची प्रतीक्षा आहे. दरम्यान या झालेल्या पावसामुळे आजपर्यंत पाण्यात वाहून जाणे, विज पडून मृत्यू होणे आदीं सारख्या घटनेत २६ जणांचा मृत्यू झाला. तर ५५ गोठ्यांची पावसामुळे पडझड झाली. शिवाय ३८५ लहान-मोठी जनावरही दगावली आहेत.