रामू ढाकणे 

छत्रपती संभाजीनगर : लहान मुलांना शाळेत जाण्यासाठी सकाळी लवकर उठावे लागत असते. पहिलीच्या वर्गापासूनच सकाळी ७ किंवा ८ वाजता शाळा भरविली जात असते. मात्र शिक्षण विभागाने आदेश काढत पहिली ते चौथीपर्यंतचे वर्ग सकाळी ९ वाजेनंतर भरविण्याचे आदेश काढले आहेत. यामुळे लहान मुलांची झोपमोड आता थांबणार आहे.

राज्यातील बहुतेक शाळा (School) या सकाळी ७ किंवा ८ वाजता भरविण्यात येत असतात. त्यामुळे शाळेच्या वेळेच्या आधी लहान मुलांना किमान १ ते २ तास आधी तयारी करावी लागते. परिणामी लहान मुलांना सकाळी ६ वाजेपूर्वी उठावे लागत असल्याने त्यांची झोप पूर्ण होत नाही. काही महिन्यांपूर्वी राज्यपाल रमेश बैस यांनी देखील  हा मुद्दा उपस्थित करून आवश्यक उपाययोजना करण्याच्या सूचना शालेय शिक्षण विभागाला (Education Department) केल्या होत्या.  

आता शाळेच्या वेळेबाबत शिक्षण विभागाने निर्णय घेत छत्रपती संभाजीनगर (Sambhajinagar) जिल्ह्यातील सर्व माध्यमांच्या आणि सर्व व्यवस्थापनांच्या पूर्व प्राथमिक ते चौथीपर्यंत शाळा सकाळी नऊ वाजेपर्यंत भरविण्याबाबतचे आदेश शिक्षण अधिकाऱ्यांनी काढले आहेत. त्यामुळे चौथीपर्यंतच्या विद्यार्थ्यांची झोपमोड आता थांबणार असून त्यांना दिलासा मिळाला आहे.