छत्रपती संभाजीनगर : कफ सिरपमुळे लहान मुलांचा मृत्यू झाल्याच्या घटना घडल्यानंतर यावर बंदी घालण्यात आली आहे. यातच छत्रपती संभाजीनगर शहरात नशेसाठी वापरला जाणारा लाखो रुपयांचा कफ सिरपचा साठा पोलिसांनी जप्त केला. या सोबतच कफ सिरप बाजारात पोहचवणाऱ्या आंतरराज्य टोळीतील दोघांना जेरबंद करण्यात आले आहे. 

देशभर कफ सिरप वरून खळबळ उडल्यानंतर सर्व यंत्रणा अलर्ट झाल्या आहेत. प्रामुख्याने मध्य प्रदेश व राजस्थानमध्ये २१ मुलांचा कफ सिरपमुळे मृत्यू झाल्याने खळबळ उडाली आहे. यानंतर आरोग्य यंत्रणा अलर्ट झाली असून काही कफ सिरप वापर व विक्रीवर बंदी आणण्यात आली आहे. असे असताना देखील बंदी घालण्यात आलेल्या कफ सिरपची विक्री होत असल्याचा प्रकार भंडाऱ्यात समोर आला आहे. यानंतर संभाजीनगरमध्ये नशेसाठी वापरला जाणारा साठा जप्तीची कारवाई करण्यात आली. 

७७ लाख ४४ हजाराचा साठा जप्त 

छत्रपती संभाजीनगरमधे नशा करण्यासाठी कफ सिरप पुरवठा करणारे आंतर राज्यीय रॅकेट पोलिसांनी समोर आणले आहे. या टोळीकडून ७७ लाख ४४ हजार रुपये किमतीच्या १८ हजार ३६० कफ सिरप बॉटलचा साठा पोलिसांनी जप्त केला आहे. छत्रपती संभाजीनगर शहर पोलीसाच्या क्राईम ब्रँचने ही कारवाई केली आहे. 

देशभरात मोठे रॅकेट असण्याची शक्यता 

पोलिसांनी ताब्यात घेतलेल्यांमध्ये मध्य प्रदेश आणि गुजरातच्या अहमदाबाद येथील दोन आरोपींचा समावेश आहे. दुर्गेश रावत, धर्मेंद्र प्रजापती, कल्पेश अग्रवाल, सय्यद नबी यांना अटक करण्यात आली आहे. या रॅकेटमध्ये आणखीही आरोपी असून त्याचा सध्या पोलीस तपास करीत आहेत. यामागे देशभरातले मोठ रॅकेट महाराष्ट्राशी कनेक्टेड असू शकते; असा पोलिसांना अंदाज आहे. त्याच दृष्टीने सध्या तपास सुरू आहे.