माधव सावरगावे, छत्रपती संभाजीनगर प्रतिनिधी

Sambhajinagar Gangapur accident : छत्रपती संभाजीनगर जिल्ह्यात भयंकर अपघाताची घटना घडली आहे. ट्रकने दुचाकीला जोरात धडक दिल्याने चिमुकल्या बहीण-भावाचा जागेवरच मृत्यू झाला. तर बाप गंभीर जखमी झाला आहे. गंगापूर जवळच्या बाबरगाव हा भयंकर अपघात झाला. बापाच्या डोळ्यासमोरच दोन्ही लेकराचा मृत्यू झाला. मुलाचे मृतदेह पाहून बाप धाय मोकलून रडत होता. हे दृश्य पाहून अनेकांच्या काळजाचा थरकाप उडाला. (Sambhajinagar Babargaon truck–bike accident full details)

५ वर्षाचा विराट प्रदीप जाधव आणि अडीच वर्षाची खुशी प्रदीप जाधव अशी अपघातातील मृतांची नावे आहेत. शेकटा येथील प्रदीप जाधव हे वैजापूर तालुक्यातील महागाव येथे रविवारी लग्नकार्यासाठी गेले होते. लग्न आटोपन ते आपल्या दोन लेकरांना मोटार सायकलवरून गंगापूर मार्गे शेकटा येथे जात होते. त्यावेळी छत्रपती संभाजीनगर मार्गावरील बाबरगाव फाटा येथील जिनिंगसमोर छत्रपती संभाजीनगरकडून गंगापूरकडे येणाऱ्या ट्रकने जाधव यांच्या दुचाकीला जोरात धडक दिली. यात दोन लेकरांचा मृत्यू झाला. वडील गंभीर जखमी आहेत, त्यांच्यावर संभाजीनगरमधील हॉस्पिटलमध्ये उपचार सुरू आहेत.

अपघातानंतर महामार्गावर स्थानिकांनी तात्काळ घटनास्थळाकडे धाव घेत मदतकार्य सुरू केले. मुलांचे मृतदेह पाहून बापाच्या डोळ्यातून अश्रूंचा बांध फुटला होता. बापाची अवस्था जिवंत मेल्यासारखी झाली होती. हे दृश्य पाहून मदतीसाठी आलेल्या प्रत्येकाचे काळीज चिरले होते. स्थानिकांनी तात्काळ अपघाताची माहिती पोलिसांनी दिली. पोलिसांनी घटनास्थळी धाव घेत ट्रक चालकावर गुन्हा दाखल केला. दोन्ही चिमुकल्याचे मृतदेह ताब्यात घेत पोस्टमार्टमसाठी रूग्णालयात पाठवले आहेत.

बाबरगाव फाटा ट्रकने दुचाकीला धडक दिली. स्थानिकांनी तात्काळ घटनास्थळी धाव घेतली. लोकांचा रोष पाहाता ट्रक चालकाने तात्काळ घटनास्थळावरून पळ काढला. पोलिसांनी त्याच्याविरोधात गुन्हा दाखल केला आहे. त्याचा शोध पोलिसांकडून घेतला जात आहे. अपघातानंतर पोलिसांनी तात्काळ रूग्णवाहिकेतून जखमी प्रदीप यांना रूग्णालयात दाखल केले. त्यांच्यावर सध्या रूग्णालयात उपचार सुरू आहेत. भीषण अपघातानंतर ट्रक चालकाने वाहन जागेवर सोडून पळ काढला. या घटनेची गंगापूर पोलिसात नोंद करण्यात आली असून अधिक तपास पोलिस करत आहेत.