गोंदिया जिल्ह्यातल्या अर्जुनी मोरगाव विधानसभा मतदारसंघात राष्ट्रवादी अजित पवार गट विरुद्ध कॉंग्रेस अशी लढत रंगली आहे. अजित पवार यांच्या राष्ट्रवादीकडून राजकुमार बडोले यांना उमेदवारी देण्यात आली आहे. तर कॉंग्रेसने दिलीप बनसोडे यांना उमेदवारी दिली आहे.

अर्जुनी मोरगाव मतदारसंघात अजित पवार गटाचे राजकुमार बडोले यांच्या नावाला मतदारांची पसंती असल्याच सकाळ एक्झिट पोलमधून दिसत आहे. त्यामुळे संभाव्य आमदार म्हणून बडोले यांचं नाव पुढे आलं आहे. तर कॉंग्रेसचा या मतदारसंघात पराभव होण्याची शक्यता आहे.

अर्जुनी मोरगाव या मतदारसंघात सर्वाधिक बंडखोरी झालेली बघायला मिळाली आहे. राजकुमार बडोले हे भाजपमधून नुकतेच राष्ट्रवादी अजित पवार यांच्या गटात आले आहेत. तर अजित पवार गटाचे विद्यमान आमदार मनोहर चंद्रिकापुडे यांना उमेदवारी डावलल्याने त्यांनी अजित पवार गटाला रामराम करत बच्चू कडू यांच्या प्रहारमध्ये प्रवेश केला आहे. तर दुसरीकडे कॉंग्रेसकडून तिकीट न मिळाल्याने कॉंग्रेसचे अजय लांजेवर यांनी देखील बंडखोरी करत अपक्ष उमेदवारी अर्ज भरला.

या सगळ्या बंडखोरीमुळे अर्जुनी मोरगाव मतदारसंघात चुरशीची लढत होऊन मतांची विभागणी होण्याची शक्यता आहे. सध्या तरी एक्झिट पोलमधून मतदारांचा कौल हा राजकुमार बडोले यांना मिळतांना दिसत आहे.