सोन्याच्या दागिन्यांच्या हव्यासापोटी एका नातेवाईक महिलेचा निर्घृण खून करून तिचा मृतदेह आंबेनळी घाटातील खोल दरीत फेकून दिल्याचा धक्कादायक प्रकार अलिबाग तालुक्यात उघडकीस आला आहे. याप्रकरणी मांडवा सागरी पोलिसांनी तातडीने दोन आरोपींच्या मुसक्या आवळल्या आहेत. सुनंदा पाटील (रा. सारळ, ता. अलिबाग) असे खून झालेल्या दुर्दैवी महिलेचे नाव आहे. याप्रकरणी पोलिसांनी अनदर्श शेडगे आणि रितेश लोहार (दोघे रा. तिनविरा) या दोन तरुणांना अटक केली आहे.

सोन्याच्या दागिन्यांसाठी रचला कट

पोलिसांनी दिलेल्या माहितीनुसार, मृत सुनंदा पाटील यांच्या अंगावरील सोन्याचे दागिने लुटण्याच्या उद्देशाने आरोपींनी हा थरारक कट रचला. आरोपींनी सुनंदा यांना बहाण्याने घरी बोलावून घेतले. त्यानंतर त्यांना एका निर्जन स्थळी नेऊन त्यांचा गळा आवळून खून केला. गुन्हा लपवण्यासाठी आणि पुरावा नष्ट करण्यासाठी आरोपींनी मृतदेह थेट महाबळेश्वरजवळील दुर्गम अशा आंबेनळी घाटात नेऊन खोल दरीत फेकून दिला.

रेस्क्यू टीमच्या मदतीने मृतदेह बाहेर काढण्यात यश

महिला बेपत्ता झाल्यानंतर मांडवा सागरी पोलिसांनी तपास चक्र फिरवली. संशयावरून अनदर्श शेडगे आणि रितेश लोहार यांना ताब्यात घेऊन त्यांची कसून चौकशी केली असता, त्यांनी गुन्ह्याची कबुली दिली. आरोपींनी मृतदेह आंबेनळी घाटात टाकल्याचे सांगितल्यानंतर पोलिसांनी तात्काळ घटनास्थळ गाठले. घाटातील दरी अत्यंत खोल आणि दुर्गम असल्याने स्थानिक सर्च आणि रेस्क्यू टीमला पाचारण करण्यात आले होते. रेस्क्यू टीमच्या जवानांनी जीवाची बाजी लावून खोल दरीतून मृतदेह यशस्वीरीत्या बाहेर काढला.

तेवाईकांनीच पैशांच्या आणि सोन्याच्या लालसेपोटी हे कृत्य केल्याने अलिबाग परिसरात प्रचंड खळबळ उडाली आहे. मांडवा सागरी पोलिसांनी दोन्ही आरोपींना बेड्या ठोकल्या असून, या गुन्ह्यात आणखी कोणाचा सहभाग आहे का, याचा अधिक तपास पोलीस करत आहेत.