Sangameshwar latest news : संगमेश्वर तालुक्यातील माभळे येथे गणपती विसर्जनादरम्यान काळजाचा ठोका चुकवणारी दुर्घटना घडली आहे. बावनदी पात्रात विसर्जन करत असताना पाण्याच्या खोलीचा आणि प्रवाहाचा अंदाज न आल्याने बाप-लेक नदीत वाहून गेले. या दुर्घटनेत वडिलांना सुखरूप बाहेर काढण्यात यश आले असले, तरी मुलाचा बुडून दुर्दैवी मृत्यू झाला आहे.

नेमकी घटना काय घडली?

मिळालेल्या माहितीनुसार, शनिवारी सायंकाळी उशिरा माभळे येथील बावनदी पात्रात गणपती विसर्जनाचे काम सुरू होते. यावेळी पुरुषोत्तम घडशी आणि त्यांचा मुलगा प्रज्वल घडशी हे दोघे विसर्जनासाठी नदीत उतरले होते. मात्र, पावसाळ्यामुळे पाण्याचा प्रवाह तीव्र असल्याने आणि पाण्याच्या खोलीचा अंदाज न आल्याने दोघेही अचानक पाण्याच्या प्रवाहात वाहून जाऊ लागले.

ग्रामस्थांचे तातडीने मदतकार्य

बाप-लेक पाण्यात बुडत असल्याचे पाहून तेथे उपस्थित ग्रामस्थांनी तात्काळ मदतकार्य सुरू केले. श्रीकांत घडशी यांनी न घाबरता नदीत उतरून पुरुषोत्तम घडशी यांना सुखरूप पाण्याबाहेर काढले. त्यानंतर स्थानिक युवकांनी नदीच्या पात्रात शोधमोहीम राबवून मुलगा प्रज्वल घडशी यालाही पाण्याबाहेर काढले. मात्र, दुर्दैवाने प्रज्वलला वेळेवर वैद्यकीय मदत मिळूनही वाचवण्यात यश आले नाही.

माभळे गावावर शोककळा

गणपती बाप्पाला निरोप देत असतानाच घडलेल्या या भयंकर दुर्घटनेमुळे संपूर्ण माभळे गावावर आणि परिसरात शोककळा पसरली आहे. ऐन सणाच्या काळात घडलेल्या या घटनेमुळे घडशी कुटुंबावर दुःखाचा मोठा आघात झाला आहे.