सांगली : एक रकमी एफआरपी वर आम्ही ठाम आहाेत. परंतु केंद्र सरकारने एफआरपी frp तीन तुकड्यात देण्याचा प्रस्ताव ठेवला आहे. त्यावर कळस म्हणजे राज्य सरकार वर्षभरात तीन तुकड्यात एफआरपी देऊ असे म्हणत आहे. खरं तर ही दोन्ही सरकार शेतकऱ्याच्या विरोधात आहेत. आम्ही यांना गुडघे टेकायला लावू असा इशारा देत एक रकमी एफआरपी घेऊ असा विश्वास स्वाभिमानी शेतकरी संघटनेचे नेते राजू शेट्टी Raju Shetti यांनी केंद्र आणि राज्य सरकारला दिला. सांगली येथे आज एका शेती विषयक कंपनीच्या उदघाटनास शेट्टी आले असता त्यांनी माध्यमांशी संवाद साधला.

शेट्टी म्हणाले सव्वा दोन महिने उलटून गेले अद्यापही पूरग्रस्तांना सरकारने मदत दिली नाही. आता केंद्र सरकारचे पथक महाराष्ट्रात येणार आहे. मला कळत नाही आता येऊन हे पथक काय पाहणार आहे. या सर्व गाेष्टीवरून कळते केंद्र सरकारला शेतकऱ्यांच्या विषयी किती तळमळ आहे.

राज्य सरकारची अद्यापही काही ठिकाणी मदत पोहचली नाही. आम्ही यासाठी जल समाधी आंदोलन सुद्धा केले. अजून काय करायचे तेव्हा सरकार मदत करणार असा प्रश्न शेट्टी यांनी राज्य सरकारला केला आहे. शेतकरी आणि पूरग्रस्तांना तातडीने मदत मिळाली नाही तर महाविकास आघाडीतील नेत्यांची दिवाळी गाेड लागू देणार नाही असा इशारा शेट्टींनी दिला. 

edited by : siddharth latkar