कल्याण अभिजित देशमुख

Kalyan Traffic:

शीळफाटा रोडवर वाहतूक कोंडीची समस्या दिवसेंदिवस वाढत चालली आहे. वाहतूक कोंडीपासून नागरिकांची सुटका व्हावी यासाठी खासदा श्रीकांत शिंदे यांनी काही प्रकल्प समोर आणले आहेत. याबाबत आपल्या ट्वीटर अकाउंटवर व्हिडीओ पोस्ट करत त्यांनी सविस्तर माहिती दिलीये. त्यांच्या या व्हिडीओवरून मनसे आमदार राजू पाटील (Raju Patil) यांनी मुख्यमंत्र्यांचं नाव घेत श्रीकांत शिंदेंवर टीकास्त्र सोडलंय. ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

कल्याण शहर वाहतूक कोंडी (Traffic Jam) मुक्त करणारा गेम चेंजर प्रकल्प अशा आशयाचा व्हिडीयो खासदार श्रीकांत शिंदे यांच्या सोशल मीडियावर अपलोड केला आहे. कल्याण लोकसभा मतदारसंघातील कल्याण, कल्याण पूर्व, डोंबिवली, बदलापूर, अंबरनाथ, उल्हासनगर शहरांसह शिळफाटा रोडवरील वाहतुकीच्या नियोजनाबाबतचा हा व्हिडीओ आहे.

ट्वीटमध्ये आमदार पाटील यांनी म्हटलं की, मुख्यमंत्री साहेब आपले पुत्र पण येथील लोकप्रतिनिधी आहेत. वाहतुककोंडी सुटावी यासाठी रोज नव्यानव्या ‘स्किम’ घेऊन येतात, त्या स्किम नसतातच. तो पॉकेटमनीसाठी केलेला 'स्कॅम' असतो, अश्या चर्चा ठेकेदार वर्गात सुरू असल्याचं राजू पाटील यांनी म्हटलं आहे.

गरोदर बायका, वृध्द, रुग्ण सगळे तासनतास ट्रॅफिकला सामोरे जातायत. तेही आपल्या सुपुत्राच्या मतदारसंघात? महाराष्ट्राने काय अपेक्षा ठेवायच्या? कधीतरी आमच्या सूचनांचा विचार करा. कदाचीत वाहतूक कोंडी कमी होईल! पाहिजे तर श्रेय तुमच्याच पुत्राला घेऊ द्या पण एकदा आमच्या सूचना ऐकण्यासाठी वेळ द्या व शिळफाट्याच्या ट्रॅफिक जामचा शिक्का तेवढा पुसा, असा उपहासात्मक सल्ला राजू पाटील यांनी दिलाय .