रत्नागिरी जिल्ह्यात गेले दाेन दिवस पडत असलेल्या पावसामुळे जनजीवन विस्कळीत झाल्याचे चित्र आहे. जिल्ह्यातील खेड तालुक्यात जगबुडी नदीने इशारा पातळी ओलांडली आहे. खेडसह चिपळूण परिसरात एनडीआरएफचे पथक दाखल झाले आहे. दूसरीकडे मुंबई गोवा महामार्गावरील परशुराम घाटात मुख्य रस्त्याची संरक्षक भिंत कोसऴल्याने धाेकादायक स्थिती निर्माण झाली आहे.

रत्नागिरीसह खेड परिसरात जोरदार पाऊस झाला. या पावसामुळे नदीपात्रात कमालीची वाढ हाेऊ लागली आहे. जगबुडी नदीची पाणीपातळी 5.25 मीटर इतकी वाढली आहे. काेकणातील या पट्ट्यातील पावसाचा पूर्वानुभव लक्षात घेता प्रशासनाने ठाेस पावले उचलण्यास प्रारंभ केला आहे. खेड, चिपळूण परिसरात एनडीआरएफचे पथक दाखल झाले आहे.

भोईवाडीत घरावर संरक्षक भिंत कोसळली

खेड तालुक्यातील सोनगाव मधल्या भोईवाडीत घरावर संरक्षक भिंत कोसळून घराचे नुकसान झाले आहे. या भागात मुसळधार पाऊस सुरू असून जमीन खचून संरक्षक भिंत थेट पुष्पा पारधी यांच्या घरावर कोसळली. त्यामुळे पारधी यांच्या घराचे मोठं नुकसान झाले आहे. कोकणात गुरुवारपासून जोरदार पाऊस सुरू असल्याने ग्रामीण भागात जमीन खाचण्याचे प्रकार सुरू झाल्याचे चित्र आहे.

परशुराम घाट रस्ता धाेकादायक बनला

दरम्यान मुंबई गोवा महामार्गावरील परशुराम घाटातील मुख्य रस्त्याची संरक्षक भिंत कोसळल्याने मुख्य रस्त्याला धोका निर्माण झाला आहे. संरक्षक भिंत कोसळल्याने मातीचे ढिगारेच्या ढिगारे गटारात वाहू लागले आहेत. सुमारे दीड किलोमीटर लांबीची ही संरक्षक भिंत हाेती.

Edited By : Siddharth Latkar