Summary -

• रायगड जिल्ह्यात ठाकरे गटाला मोठा धक्का

• माजी जिल्हा संपर्कप्रमुख नागेंद्र राठोड भाजपमध्ये प्रवेश करणार

• भाजप प्रदेशाध्यक्ष रविंद्र चव्हाण यांच्या उपस्थितीत होणार प्रवेश

• स्थानिक स्वराज्य संस्थांच्या निवडणुकीपूर्वी भाजपची ताकद वाढली

आगामी स्थानिक स्वराज्य संस्थांच्या निवडणुकीपूर्वी राज्यात मोठ्या राजकीय घडामोडी घडताना दिसत आहेत. अनेक बड्या नेत्यांसह पदाधिकारी आणि कार्यकर्त्यांचे जोरादर पक्षांतर सुरू आहे. निवडणुकीपूर्वी आपली ताकद वाढवण्याचे प्रयत्न सर्वच पक्षांकडून सुरू आहे. अशातच रायगडमध्ये शिवसेना ठाकरे गटाला मोठा धक्का बसला आहे. भाजपने उद्धव ठाकरे यंचा जवळचा शिलेदार फोडला. माजी जिल्‍हा संपर्कप्रमुख नागेंद्र राठोड भाजपमध्ये प्रवेश करणार आहेत.

मिळालेल्या माहितीनुसार, ऐन स्थानिक स्वराज्य संस्थांच्या निवडणुकीच्या तोंडावर रायगडमध्ये ठाकरे गटाला मोठा धक्का बसल्याची माहिती समोर आली आहे. ठाकरे गटाचे माजी जिल्हा संपर्क प्रमुख नागेंद्र राठोड शिवसेना ठाकरे गटाला जय महाराष्ट्र करत भाजपमध्ये प्रवेश करणार आहेत. पक्षांतर्गत गटबाजीला कंटाळून काही दिवसांपूर्वी राठोड यांनी रायगड जिल्हा संपर्क प्रमुखपदाचा तडकाफडकी राजीनामा दिला होता.

नागेंद्र राठोड हे २८ ऑक्टोबर म्हणजे उद्या भाजपचे कमळ हाती घेणार आहेत. भाजपचे प्रदेशाध्‍यक्ष रविंद्र चव्‍हाण यांच्‍या उपस्थितीत मुंबईमध्ये नागेंद्र राठोड यांचा भाजपमध्ये प्रवेश होणार आहे. आगामी स्थानिक स्वराज्य संस्थांच्या निवडणुकीसाठी राठोड यांचा प्रवेश भाजपसाठी महत्वाचा ठरणार आहे. नागेंद्र राठोड यांच्यासोबत त्यांचे अनेक कार्यकर्ते देखील भाजपमध्ये प्रवेश करणार आहेत. त्यामुळे रायगडमध्ये भाजपची ताकद चांगलीच वाढणार आहे.