रायगड जिल्ह्यातील वरंध येथे अल्पवयीन १० वर्षांच्या मुलीवर बलात्कार झाल्याची धक्कादायक घटना उघडकीस आली आहे. या प्रकरणामुळे संपूर्ण परिसरात संताप आणि भीतीचे वातावरण निर्माण झाले आहे. पिडीत मुलगी घरात एकटी असताना आरोपीने या संधीचा गैरफायदा घेत हा गंभीर गुन्हा केला आहे.

मिळालेल्या माहितीनुसार, पिडीत मुलीचे वडील गावी गेले होते तर आई मजुरीसाठी बाहेर गेल्यामुळे मुलगी घरी एकटी होती. त्याचवेळी आरोपी सचिन पांडुरंग सुतार, वय वर्ष ३७, वरंध येथे राहणाऱ्या पुरुषाने पाण्याचा बहाणा करून मुलीला फसवले. घरात कोण नसल्याचे पाहून आरोपी तिला घेऊन गेला आणि तिच्यावर बळजबरी केली. घरी परतल्यानंतर आईला मुलीकडून या घटनेची माहिती मिळाली. मुलीच्या आईने तातडीने महाड MIDC पोलीस ठाण्यात तक्रार दाखल केली.

या गंभीर प्रकाराबाबत प्रकरण नोंदवण्यात आले असून आरोपीवर भारतीय न्याय संहितेच्या संबंधित तरतुदीखाली तसेच बालकांचे लैंगिक अपराधांपासून संरक्षण अधिनियम (POCSO) अंतर्गत गुन्हा दाखल करण्यात आला आहे. पोलिसांनी आरोपीचा शोध घेण्यासाठी कार्यवाही सुरू केली असून लवकरच त्याला अटक करण्यात येईल असा अंदाज वर्तवला जात आहे.

या भयानक घटनेमुळे परिसरातील नागरिकांमध्ये भीतीचे वातावरण झाले आहेत. स्थानिकांनी आरोपीवर कठोर कारवाई करून अल्पवयीन मुलींच्या सुरक्षिततेसाठी पोलीस प्रशासनाने खबरदारी घ्यावी अशी मागणी केली आहे. गावकऱ्यांमध्ये संताप असून समाजात वाढत चाललेल्या अशा घटनांवर त्वरीत आणि कठोर शिक्षा व्हावी ही मागणी सर्वत्र होत आहे.