सचिन कदम, साम टीव्ही

रायगड : महाडमधून धक्कादायक घटना समोर आली आहे. स्पर्धेसाठी महाडमध्ये आलेल्या १३ वर्षीय विद्यार्थिनीचा महाडमध्ये मृत्यू झाला आहे. निधी समीर म्हात्रे असे मृत्यू झालेल्या विद्यार्थिनीचे नाव आहे. विद्यार्थिनी निधीच्या मृत्यूने शाळेत एकच खळबळ उडाली आहे.

अलिबागमधील शहाबाजमधून १३ वर्षीय निधी समीर म्हात्रे ही महाडमध्ये शालेय स्पर्धेसाठी आली होती. कोकण एज्युकेश सोसायटीच्या रायगडमधील शाळांचे आंतर शालेय स्पर्धांसाठी विद्यार्थिनी महाडला आल्या होत्या.

नेमकं काय घडलं?

निधी ही आंतर शालेय स्पर्धेसाठी महाडला आली होती. स्पर्धेसाठी आलेली निधी अचानक शाळेच्या आवारात चक्कर येऊन जमिनीवर कोसळली. बेशुद्ध अवस्थेत निधीला महाडमध्ये खासगी रुग्णालयात दाखल केले. रुग्णालयात दाखल केलेल्या निधीला डॉक्टरांनी मृत घोषित केलं. या प्रकरणी महाड शहर पोलिस घटनास्थळी आणि रुग्णालयात दाखल झाले. त्यानंतर त्यांनी चौकशी सुरू केली. निधीच्या अशा प्रकारे अचानक मृत्यूचे कारण समजू शकले नाही.

निधीच्या मृत्यूने वर्गमित्रांमध्ये शोककळा

निधी खेळामध्ये हूशार होती. तिच्या खिलाडीवृत्तीमुळे तिला महाडमध्ये आंतर शालेय स्पर्धेसाठी संधी मिळाल होती. याच शालेय स्पर्धेसाठी मोठ्या उत्साहात खेळायला आली होती. निधीची स्पर्धेच्या आदल्या दिवसांपासून लगबग सुरू होती. ती आज स्पर्धेसाठी अलिबागहून महाडला आली होती. मात्र, आज स्पर्धेसाठी आलेल्या निधीवर काळाने झडप घातली. तिचा शाळेच्या मैदानात कोसळून मृत्यू झाला. निधीच्या मृत्यूने तिच्या वर्गमित्रांमध्ये शोककळा पसरली आहे.

टिटवाळ्यात महिलेला टेम्पोने चिरडले

टिटवाळा–गोवेली रस्त्यावर घोटसई फाट्याजवळ भरधाव वेगात आलेल्या पिकअप टेम्पोने पादचारी महिलेला चिरडल्याची धक्कादायक घटना घडली. या अपघातात सुरेखा खंडागळेचा मृत्यू झाला. सुरखा यांच्या मृत्यूने खंडागळे कुटुंबावर दु:खाचा डोंगर कोसळला आहे.