मंगेश कचरे, साम प्रतिनिधी

पुणे–सोलापूर राष्ट्रीय महामार्गावर दोन कारचा भीषण अपघात झालाय. सोलापूरकडे जाणाऱ्या भरधाव कारचा अचानक टायर फुटला. त्यानंतर भरधाव कार दुभाजक ओलांडत दुसऱ्या एका वाहनाला धडकली. या भीषण अपघातात तीन जण जखमी झाले आहेत. त्यांना उपचारासाठी नजीकच्या रुग्णालयात दाखल करण्यात आले आहे. दरम्यान या दुर्घटनेत दोन्ही कारचे मोठ्या प्रमाणात नुकसान झाले आहे. हा अपघात भिगवण जवळील बीट कंपनी परिसरात झाला आहे.

प्रथमदर्शींनी दिलेल्या माहितीनुसार, इनोव्हा कार पुण्याकडून सोलापूरकडे जात होती. त्यावेळी पुणे–सोलापूर महामार्गावरील भिगवणजवळ इनोव्हा कारचा टायर फुटला. त्यामुळे चालकाचे कारवरील नियंत्रण सुटलं आणि कार डिव्हाइडर ओलांडून विरुद्ध दिशेने येणाऱ्या वाहनांच्या लेनमध्ये शिरली. त्यावेळी इनोव्हा कार पुण्याकडून सोलापूरकडे जाणाऱ्या एका कार धडकली. , दोन्ही कारचे मोठे नुकसान झाले आहे.

अपघातानंतर महामार्गावरील वाहतूक काही काळ विस्कळीत झाली असून, सध्या पोलिसांकडून मार्गावरील वाहने सर्व्हिस रोडवरून वळवण्यात आली आहेत. दोन्ही कारच्या या अपघातात तीन जण जखमी झाले असून त्यांना जवळील रुग्णालयात दाखल करण्यात आले आहे.

पुणे-सोलापूर महामार्गावर भीषण अपघात

पुणे-सोलापूर महामार्गावर स्कोर्पिओ चालकाचे नियंत्रण सुटल्याने भीषण अपघात झाला होता. या अपघातात एकाचा मृत्यू झाला असून तिघेजण गंभीर जखमी झाले आहेत. या अपघातात स्कोर्पिओ कारचा चक्काचूर झाला आहे. हा अपघात कोरेगाव मूळ ग्रामपंचायत हद्दीतील इनामदार वस्ती परिसरात घडला होता. गौरख त्र्यंबक माने असे मृत्यू झालेल्या व्यक्तीचे नाव आहे. तर समाधान अंकुश बाबर, विजय सूर्यकांत माने, अलिकेश खान असे अपघातात जखमी झालेल्या तिघांची नावे आहेत.

मिळालेल्या माहितीनुसार, समाधान बाबर यांचे मामा विजय माने, चुलत मामा गौरख माने व त्यांचे मित्र अलिकेश खान हे चौघेजण मुंबई येथे कामानिमित्त गेले होते. काम झाल्यानंतर हे चौघेही गुरुवारी संध्याकाळी मुंबई येथून रात्री करमाळ्याकडे निघाले. हडपसर पुणे येथे सकाळी साडेसहा वाजताच्या सुमारास आले, नंतर विजय माने हे स्कार्पिओ चालवण्यास बसले होते. तर त्यांच्या शेजारील सीटवर गौरख माने हे बसले होते.

तर पाठीमागील सीटवर समाधान बाबर व विजय माने हे बसले होते. उरुळी कांचन पोलीस ठाण्याच्या हद्दीतील प्रयागधाम फाटा व कोरेगाव मूळ जवळ आले असता विजय माने यांचा स्कोर्पिओवरील ताबा सुटला आणि स्कार्पिओ कार ही हायवेवरून खाली उतरून झाडाला धडकली होती.