पुणे सोलापूर महामार्गावरील मदनवाडी (सकुंडे वस्ती)गावच्या हद्दीत रीलस्टार प्रतीक राम शिंदे याच्या चारचाकीमुळे भीषण अपघात घडला आहे. या भीषण अपघातात तीन गाड्यांचे प्रचंड नुकसान झाले आहे. सुदैवाने जीवितहानी झालेली नाही. मात्र, काही जखमींवर रूग्णालयात उपचार सुरू आहेत. या घटनेनंतर परिसरात खळबळ उडाली आहे.

अपघात नेमका कसा झाला?

पोलिसांनी दिलेल्या माहितीनुसार, तक्रारदार निखील बाळासाहेब होले आपल्या क्रेटा गाडीतून महामार्गावरून जात होते. त्यावेळी रीलस्टार प्रतीक शिंदे याची भरधाव फॉर्च्युनर आली. फॉर्च्युनरनं क्रेटाला जोरदार धडक दिली. धडकेची तीव्रता इतकी होती की, क्रेटा पुढे असलेल्या मारूती वॅगनरवर आदळली.

परिणामी या भीषण अपघातात तिन्ही गाड्यांचे प्रचंड नुकसान झाले. तीनही गाड्यांचा अक्षरश: चुराडा झाला. घटनेनंतर महामार्गावर काही काळ वाहतूक कोंडी झाली होती. अपघात घडल्यानंतर स्थानिकांनी घटनास्थळी धाव घेतली. तसेच पोलिसांना याची माहिती देण्यात आली. स्थानिक आणि पोलिसांनी मदतकार्य केले. या अपघातानंतर महामार्गावर काही काळ वाहतूक कोंडी झाली होती.

सुदैवाने या भीषण अपघातात कुणालाही गंभीर दुखापत झालेली नाही. मात्र, अपघातानंतर परिसरात चर्चांना उधाण आलं. 'लोकप्रियतेच्या नावाखाली काही लोक फिल्मीस्टाईल वाहनं चालवतात. यामुळे सामान्य नागरिकांच्या जीवाला धोका निर्माण होतो. अशा चालकांवर कठोर कारवाई करायला हवी',अशा प्रतिक्रिया नागरिकांनी दिल्या. या प्रकरणी प्रतीक शिंदेवर गुन्हा दाखल करण्यात आला आहे.