pune gangster Bandu Andekar Nana Peth House : पुण्यातील कुख्यात गुंड बंडू आंदेकर याला पोलिसांनी आपला इंगा दाखवला आहे. आयुष कोमकर हत्या प्रकरणात तपास वेगात सुरू आहे. त्यासंदर्भात आणखी काही धागेदोरे मिळतात का, हे पाहण्यासाठी बंडू आंदेकर याला मध्यरात्री नाना पेठेत आणलं. त्याच्या घराची झाडाझडती पोलिसांनी घेतली. कुख्यात गुंड बंडू आंदेकरच्या घरातून कोट्यवधींचा मुद्देमाल पोलिसांनी जप्त केला आहे.

कुख्यात गुंड बंडू आंदेकर याच्या घराची पोलिसांनी घेतलेल्या झडतीत कोट्यवधी रुपयांचा ऐवज हाती लागलाय. पोलिसांनी तब्बल ६७ लाख रूपयांचे सोन्याचे दागिने. २ लाख ५० हजार रुपयांची रोकड, एक अलिशान मोटार कार, विविध करारनामे आणि कर भरल्याच्या पावत्या, असा मोठा मुद्देमाल जप्त केलाय. त्याशिवाय आंदेकरने केलेल्या जमीन व्यवहाराच्या काही पावत्याही पोलिसांना मिळाल्या आहेत.

१९ वर्षाच्या आयुष उर्फ गोविंद गणेश कोमकर याची गणपती विसर्जनाच्या आदल्या रात्री हत्या करण्यात आली होती. आयुषच्या खुनाचा तपास आता गुन्हे शाखेकडे वर्ग करण्यात आलाय. गृहकलहातून बंडू आंदेकरने स्वतःच्याच नातवाच्या हत्येचा कट रचला होता. ५ सप्टेंबरला गणेश विसर्जनाच्या पूर्वसंध्येला रात्री साडेसातच्या सुमारास नाना पेठेत हल्लेखोरांनी आयुष कोमकरवर गोळ्यांचा वर्षाव केला. गंभीर जखमी झालेल्या आयुष्याचा घटनास्थळीच मृत्यू झाला. खुनानंतर आंदेकर कुटुंबासह प्रवास करून देवदर्शनासाठी निघाला होता, अशी माहिती तपासात समोर आली आहे. पोलिसांनी आतापर्यंत 8 लोकांना बेड्या ठोकल्या आहेत.

गुंड बंडू आंदेकरला पोलिसांनी आयुषच्या हत्येनंतर दुसऱ्याच दिवशी बेड्या ठोकल्या होत्या. आंदेकरला पोलिसांनी कोर्टात हजर केले. त्यावेळी त्याने मी माझ्या नातवाला का मारू असा उलट प्रश्न विचारला होता अन् या हत्येशी माझा संबंध नसल्याचे सांगितलं होतं. मात्र पोलीस तपासातून ही हत्या वनराज आंदेकरच्या खुनाचा बदला घेण्यासाठीच करण्यात आल्याचे समोर आलेय.