अक्षय बडवे, पुणे

देवदर्शनासाठी निघालेल्या मित्रांवर काळाने घाला घातला आहे. कंटेनरने तिघांना चिरडत कारला जोरदार धडक दिली. या अपघातामध्ये एकाचा दुर्दैवी मृत्यू झाला तर दोघे जण गंभीर जखमी झाले आहेत. दौंड तालुक्यातील पुणे-सोलापूर महामार्गावर हा भीषण अपघात झाला आहे. दुरुस्तीसाठी थांबलेल्या स्विफ्ट कारला कंटेनरने पाठीमागून जोरदार धडक दिली. हा अपघात सीसीटीव्हीमध्ये कैद झाला असून थरकाप उडवणारा व्हिडीओ समोर आला आहे.

मिळालेल्या माहितीनुसार, दौंड तालुक्यातील पुणे-सोलापूर महामार्गावर हा भीषण अपघात झाला. बुधवारी सकाळी ११.३० वाजता दौंड तालुक्यातील वाखरी या गावात ही घटना घडली. पुण्यातील ४ मित्र अक्कलकोट येथे देवदर्शनासाठी निघाले होते. वाखरीजवळ त्यांची कार गरम झाल्याने त्यांनी रस्त्याच्या कडेला उभी केली होती. सर्वजण कारमधून खाली उतरले होते आणि बाजूला थांबले होते.

या चार मित्रांपैकी एकाने पुण्याकडून सोलापूरला जात असलेला एक भरधाव कंटेनर त्यांच्या दिशेने येत असल्याचे पाहिले आणि त्याने कारमधून उडी मारली. मात्र इतर मित्रांना या कंटेनरने जोरदार धडक दिली. तिघांनाही कटेनरने चिरले. यातील एका तरुणाला कंटेनरने दूरपर्यंत फरफटत नेले.

पुढे जाऊन हा कंटेनर जेव्हा थांबला तेव्हा चालक प्रदीप माने हा दारू पिऊन वाहन चालवत असल्याचे निदर्शनास आले. पोलिसांनी कंटेनेर चालकाला ताब्यात घेतले. त्याच्याविरोधात गुन्हा दाखल करत त्याला अटक केली. ही घटना सीसीटीव्हीमध्ये कैद झाली असून त्याचा व्हिडीओ आता समोर आला आहे. हा अंगाचा थरकाप उडवणारा सीसीटीव्ही व्हिडीओ सध्या व्हायरल होत आहे.