पुणे : राज्यातील जीबीएस आत्तापर्यंत ७२ रुग्ण बरे झाले आहेत. तर या आजाराची लागण झालेल्या तीन नवीन रुग्णांची राज्यात नोंद झाली आहे. राज्यातील एकूण रुग्णांची संख्या १७३ वर गेली आहे.

आज गुरुवारी शहरातील एका रुग्णाचा जीबीएसमुळे दुर्दैवी मृत्यू झाला आहे. कर्वेनगरमधील वडारवस्ती येथील ६३ वर्षीय पुरुषाचा रुग्णालयात मृत्यू झाला. रुग्णाला ताप, जुलाब, चालण्यास त्रास आणि पायांमध्ये अशक्तपणा जाणवत होता. त्याला २८ जानेवारी रोजी रुग्णालयात दाखल करण्यात आले होते. तर काल बुधवारी रुग्णाला अत्यवस्थ वाटू लागले होते. त्यानंतर पुढील अत्यावश्यक उपचार आणि सीपीआर देण्यात आला. उपचारादरम्यान, या रुग्णाचा मृत्यू झाला. रुग्णामध्ये ब्रेन स्ट्रोक आणि जीबीएसचे निदान झाले.

दरम्यान, सध्या ५५ रुग्ण आयसीयूमध्ये आणि २१ रुग्ण व्हेंटिलेटरवर उपचार घेत आहेत. राज्यात जीबीएसचे निदान झालेल्या सहा रुग्णांच्या मृत्यूची आत्तापर्यंत नोंद झाली आहे. यापैकी पाच रुग्णांचा मृत्यू पुणे जिल्ह्यात झाला असून, एक मृत्यू सोलापूर जिल्ह्यातील आहे. शहरातील चार मृत्यू झालेले रुग्ण नांदेड, धायरी, नांदोशी, कर्वेनगर या भागातील आहेत. तर, एक रुग्ण पिंपरी चिंचवड येथील रहिवासी होता. सोलापूर जिल्ह्यात मृत्यू झालेला रुग्णही धायरी येथील रहिवासी होता.

आत्तापर्यंतच्या १७३ रुग्णांपैकी ८७ रुग्ण हे किरकटवाडी, नांदेड, नांदोशी, धायरी या महापालिकेत समाविष्ट झालेल्या गावातील आहेत. उर्वरित ३४ रुग्ण पुणे महापालिका, २२ रुग्ण पिंपरी चिंचवड महापालिका आणि २२ रुग्ण पुणे ग्रामीण हद्दीतील आहेत. इतर आठ रुग्ण इतर जिल्ह्यांमधील आहेत. सार्वजनिक आरोग्य विभागाच्या अहवालानुसार, जीबीएसचे सर्वाधिक रुग्ण २० ते २९ या वयोगटातील आहेत.