सचिन जाधव
पुणे : सोयबर चोरट्यांचे फसवणूक करण्याचे नवनवीन फंडे समोर येत आहेत. यात प्रामुख्याने शेअर बाजारातील गुंतवणुकीवर जादा पैसे देण्याचे आमिष दाखवत फसवणूक करण्याचे प्रकार वाढत आहेत. असाच प्रकार पुण्यात समोर आला असून एका तरुणाची तब्बल १ कोटी ९४ लाख ८२ हजार रुपयांची फसवणूक झाल्याचे समोर आले आहे. 

सायबर चोरटे वेगवेगळे फंडे काढून फसवणूक करत आहेत. मागील काही दिवसात असे प्रकार अधिक प्रमाणात वाढले आहेत. यामुळे ऑनलाइन पद्धतीने फसवणुकीच्या घटना समोर येत असून पुण्यात (Pune) अशाच प्रकारे तब्बल एक कोटी ९४ लाख ८२ हजार ८०४ रुपयांची सायबर चोरट्यांनी फसवणूक केली आहे. मोठ्या कंपन्याचे शेअर आणि आयपीओ खरेदी आणि विक्री केल्यानंतर (Cyber Crime) अधिक नफा मिळेल असे आमिष दाखवून तरुणाची फसवणूक करण्यात आली आहे. हा प्रकार १७ जुलै ते ९ सप्टेंबर या काळात घडला असून तरुणाने सायबर पोलिस ठाण्यात तक्रार दाखल केली आहे. 

ॲप डाउनलोड करत गुंतवणुकीस सांगितले 
सायबर चोरट्यांनी तक्रारदार तरुणाला फोन करून आपण एसबीआय सिक्युरिटीज स्टॉक कंपनीचे एजंट असल्याचे सांगितले. त्यांनी तक्रारदाराला एसबीआय सर्व्हिस ग्रुपमध्ये सहभागी करून घेतले. त्यानंतर तक्रारदाराला एक लिंक पाठवून एसबीआय सिक्युरिटीजचे मोबाइल ॲप डाउनलोड करायला लावले. या ॲपमधून विविध कंपन्यांचे शेअर्स व आयपीओ खरेदी विक्री केल्यावर जास्त परतावा मिळण्याचे आमिष दाखवले. त्यानुसार तक्रारदाराला गुंतवणूक करण्यास सांगितले. आपली फसवणूक झाली हे लक्षात आल्यावर तरुणांनी सायबर पोलिसात तक्रार दिली. त्यानुसार पोलिसांकडून तपस सुरु आहे.