सचिन जाधव
पुणे : वयाच्या ८५ व्या वर्षी आजोबांना विवाह करण्याची इच्छा होती. यामुळे वधूचा शोध सुरु होता. अशातच एका पेपरात आलेली जाहिरात पाहून आजोबांनी विवाहइच्छुक महिलेशी संपर्क साधला. बोलणे झाल्यानंतर दोघेही तयार झाले. या आजोबांना विश्वास दिला. मात्र गळ्यात वरमाला पडण्यापूर्वीच आजोबांची अशी गफलत झाली कि त्यांना आता पोलिसांची मदत घ्यावी लागत आहे.  

पुण्यातल्या पेठ परिसरात राहणाऱ्या आजोबांची लग्नाच्या नावाने फसवणूक झाली आहे. लग्नास इच्छुक असल्याने आजोबानी वृत्तपत्रातील “वर” पाहिजे अशी जाहिरात पाहिली. यावर दिलेल्या फोनवरुन संपर्क केला. सुरवातीला फोनवर असलेल्या महीलेने नाव नोदंणी, रजिस्ट्रेशन फी घेतली. त्यानंतर आजोबाना संभाव्य वधुचे नाव आणि फोन नंबर दिला. आजोबांनी संपर्क केल्यानंतर समोरून आकांक्षा पाटील बोलत असल्याचे सांगण्यात आले. 

आजोबाना ओढले प्रेमाच्या जाळ्यात 

दरम्यान आजोबांनी जोशी या कथित वधूशी फोनवर संपर्क केल्यानंतर आजोबांना खोटे सांगून प्रेमाच्या जाळ्यामध्ये अडकवले. त्यांचा विश्वास संपादन करून मावस बहीण आजारी असल्याने तिकडे गेले असल्याचे सांगितले. इतकेच नाही तर काही दिवसांनी तिचा स्वतःचा अपघात झाला असून उपचाराकरता पैशाची आवश्यकता असल्याचे सांगितले. पुण्यात परत आल्यानंतर पैसे परत देईल असे सांगितले. 

११ लाख ४५ हजार रुपये केले ट्रान्स्फर 

महिलेने सांगितल्यावर विश्वास ठेवून आजोबानी तब्बल ११ लाख ४५ हजार ३५० ऑनलाइन पद्धतीने ट्रान्सफर करून दिले. मात्र काही दिवसांनी महिलेशी कोणत्याही प्रकारचा संपर्क होऊ शकला नाही. यामुळे फसवणूक झाल्याचे लक्षात आल्यानंतर या प्रकरणी तिघा अज्ञात महिलेविरोधात बिबवेवाडी पोलिसात गुन्हा दाखल करण्यात आला आहे.