Pune Bypoll Election Candidates : विधान परिषद निवडणुकांनंतर आता पुण्यातील कसबा आणि चिंचवड पोटनिवडणुकीकडे सर्वांचं लक्ष आहे. या पोटनिवडणुकीसाठी काँग्रेस आणि राष्ट्रवादीचे उमेदवार निश्चित झाल्याची माहिती सूत्रांनी दिली आहे. कसबा मतदारसंघ काँग्रेस लढणार असून चिंचवड मतदारसंघात राष्ट्रवादी आपला उमेदवार देणार असल्याची माहिती सूत्रांनी दिली आहे.

चिंचवड विधानसभा मतदार संघातून राष्ट्रवादीने राहुल कलाटे यांना उमेदवारी दिली असल्याची माहिती आहे, तर कसबा मतदारसंघासाठी काँग्रेसने रवींद्र धंगेकर यांचे नाव जवळपास शिच्छित केल्याची माहिती सूत्रांनी दिली आहे. महाविकास आघाडीकडून आज उमेदवारांची नावे जाहीर होणार असल्याची माहिती आहे.

फडणवीसांच्या मनातील उमेदवार कोण?

दरम्यान कसबा आणि चिंचवड विधानसभा मतदारसंघाची पोटनिवडणूक बिनविरोध करण्यासाठी प्रयत्न करणार असल्याचे फडणवीस म्हणाले आहेत. परंतु महाविकास आघाडीने आपले उमेदवार निवडणुकीत उतरवण्याची तयारी सुरू केली आहे. त्यामुळे ही निवडणुक बिनविरोध होणार का आणि होणार नसेल तर फडणवीस कोणता उमेदवार मैदानात उतरवणार याकडे सर्वांच लक्ष लागलं आहे.

शिवसेनेची भूमिका काय?

शिवसेनेच्या उद्धव ठाकरे गटाचे नेते संजय राऊत यांनी या निवडणुकीवर प्रतिक्रिया दिली आहे. महाविकास आघाडीत कोणतेही मतभेद नसून कसबा आणि चिंचवड या दोन्ही जागा आम्ही एकत्रीत लढू असे राऊत म्हणाले आहेत. आमचा सर्वांचा राजकीय शत्रू एकच आहे आणि त्यांचा पराभव व्हायला हवा असे राऊत म्हणाले. तसेच आम्ही विधानपरिषदेच्या निवडणुकीत दाखवून दिले असा टोला देखील त्यांनी प्रसारमाध्यमांशी बोलताना लगावला.