Gudi Padwa 2023 : गुढी पाडव्याच्या शुभ मुहुर्तावर आज राज्यातील महिलांसाठी विशेषत: चंद्रपूर, गडचिराेली भागातील महिलांसाठी एक गाेड आणि खूष करणारी बातमी घेऊन आलाे आहाेत. राज्य परिवहन महामंडळाच्या (msrtc bus) पाठाेपाठ खासगी बस वाहतुक संघटनेने (private bus owners association) महिलांसाठी प्रवास शुल्कात 50 टक्के सवलत देण्याचा निर्णय घेतला आहे. हा निर्णय चंद्रपूर-गडचिरोली ट्रॅव्हल्स असोसिएशनने (chandrapur- gadchiroli travels association) नुकताच जाहीर केला आहे. (Breaking Marathi News)

राज्य सरकारने एसटी बसमध्ये महिला प्रवाशांना 50 टक्के सूट देण्याचा निर्णय घोषित केला. त्याच्या अंमलबजावणीला देखील सुरुवात झाली आहे. आता त्यापाठोपाठ खाजगी ट्रॅव्हल्स मालकांनी देखील आपल्या बसमध्ये महिलांना 50 टक्के सूट देण्याची चंद्रपूर-गडचिरोली ट्रॅव्हल्स असोसिएशनने घोषणा केली आहे.

महिलांना तिकीत दरात 50 टक्के सवलत

या संघटनेची मंगळवारी तातडीची बैठक झाली. या बैठकीत विविध विषयांवर चर्चा झाली. त्यामध्ये महिलांसाठी प्रवास भाडे शुल्कात सवलत देण्याचा विचार पुढे आला. यावर सर्वांनी एकमत करुन महिलांसाठी 50 टक्के तिकीट दरात सवलत देण्याचा निर्णय घेण्यात आला अशी माहिती चंदन पॉल ( अध्यक्ष, ट्रॅव्हल्स असोसिएशन) यांनी दिली.

आजपासून अंमलबजावणीस प्रारंभ

या निर्णयाची अंमलबजावणी आजपासून म्हणजे गुढी पाडव्याच्या सणा दिवशी सुरु झालेली आहे. एसटीच्या निर्णयानंतर खाजगी बस चालकांना व्यवसायात जोरदार फटका बसू लागला. त्यातून सावरण्यासाठी तातडीने हा उपाय शोधण्यात आला आहे. त्या निर्णायामुळे महिला प्रवाशांना आता दुहेरी फायदा मिळणार आहे.

Edited By : Siddharth Latkar