वंचित बहुजन आघाडीचे युवा नेते सुजात आंबेडकर यांच्या सोलापूरमधील वक्तव्याने राजकीय वर्तुळात एकच चर्चांना उधाण आलं आहे. प्रणिती शिंदे लवकरच भाजपमध्ये जातील, असा दावा सुजात आंबेडकर यांनी केला होता. सुजात आंबेडकर यांच्या दाव्यानंतर खासदार प्रणिती शिंदे यांनी प्रत्युत्तर दिलं आहे.

प्रणिती शिंदे यांनी सोशल मीडियावर पोस्ट करत सुजात आंबेडकर यांना प्रत्युत्तर दिलं. इंस्टाग्रामवर स्टोरी लिहित काँग्रेस खासदार प्रणिती शिंदेंनी आंबेडकरांचा दावा फेटाळूना लावला आहे. ‘जनमाणसात संभ्रम निर्माण करणारे वक्तव्य विरोधकांना मदत करतात, याचे भान मित्रपक्षाने ठेवावे, असे प्रणिती शिंदे यांनी म्हटलं आहे.

प्रणिती शिंदे नेमकं काय म्हणाल्या?

प्रणिती शिंदे म्हणाल्या की, 'साधारणपणे अशा विधानांना मी उत्तर देत नसते. पण महापालिका निवडणुकींना सामोरे जाताना अशी विधान जनमाणसात संभ्रम निर्माण करतात. याचे भान प्रत्येक मित्र पक्षाने ठेवावे. विधानसभेच्या आणि लोकसभेच्या निवडणुकीत देखील अशा अफवा पसरवल्या गेल्या होत्या. या अफवांना बळी पडू नका आणि संविधानाच्या उरावर बसू पाहणाऱ्या धूर्त शत्रूशी आपला लढा आहे. अशी बेलगाम विधान करून आपली लढाई कमकुवत करू नका. होच माझी त्यांना विनंती आहे'.

सुजात आंबेडकर काय म्हणाले होते?

सोलापुरातून वंचितचे युवा नेते सुजात आंबेडकरांनी काँग्रेस खासदार प्रणिती शिंदेंवर गंभीर आरोप केले होते. मनपा निवडणुकीनंतर प्रणिती शिंदे या भाजपमध्ये जाणार आहेत. प्रणिती शिंदे आणि मुख्यमंत्री देवेंद्र फडणवीस यांची डिल झाल्याचा दावा सुजात आंबेडकरांनी केला होता. आपल्या विरोधात भाजप आहे. आरएसएस जरी निवडणूक लढवत असती तर त्यांना तिकडेही हरवलं असतं. आपल्या विरोधात भाजप आहे आणि दुसऱ्या बाजूला ही भाजपच आहे. कारण प्रणिती शिंदे या भाजपसाठी काम करतात हे सर्वांना माहिती आहे'.