पालिका निवडणुकांच्या तोंडावर महायुतीतील धुसफूस सातत्यानं समोर येतेय. तिन्ही पक्षातील काही नेते स्वबळाची भाषा करत असतानाच एकनाथ शिंदेंच्या अडचणी वाढताना दिसतायेत. मोठ्या नेत्यांच्या कारनाम्यांनी पक्षाला फटका बसण्याची शक्यता आहे. पवईतील ओलीसनाट्यादरम्यान रोहित आर्यनं माजी शिक्षणमंत्री दीपक केसरकर यांच्याशी फोनवरुन संपर्क साधण्याची मागणी केली होती.

मात्र केसरकरांनी आर्यशी बोलण्यास नकार दिल्याचा दावा एका आयपीएस अधिकाऱ्याने केल्याची माहिती समोर आली आहे. या प्रकरणी केसरकरांची चौकशी होण्याची शक्यता आहे. केसरकरांनी वेळीच संवाद साधला असता तर रोहित वर्माला वाचला असता, अशी चर्चा सुरु झालीय.

दुसरीकडे शिंदे सेनेचे मुंबईतील मागाठाणे मतदारसंघाचे विद्यमान आमदार प्रकाश सुर्वे यांनीही ऐन निवडणुकीच्या तोंडावर उत्तर भारतीय मतांवर डोळा ठेऊन वादग्रस्त वक्तव्य केलंय. मराठी माझी आई आहे, तर उत्तर भारत माझी मावशी आहे. आई मेली तरी चालेल, मात्र मावशी मरायला नाही पाहिजे, अशी मुक्ताफळं उधळलीयेत. मतांच्या लाचारीसाठी सुर्वे यांनी वक्तव्य केल्याचा हल्लाबोल विरोधकांनी केलाय.

काही दिवसांपूर्वी शिंदे सेनेचे मंत्री प्रताप सरनाईक यांनीही हिंदी आपली लाडकी बहिण आहे. मी हिंदी बोलतो, तुम्हीही बोला असं वक्तव्य केलं होतं. मुंबई, ठाण्यात उत्तर भारतीय मतांची मोठी संख्या आहे. त्यामुळे शिंदे सेनेचे नेते अशी विधानं सर्रास करत आहेत. मात्र पालिका निवडणुकीत ही वादग्रस्त वक्तव्य पक्षाला अडचणीची ठरणार आहेत. विरोधकांच्या हाती आयतं कोलीत मिळालं आहे. म्हणून एकनाथ शिंदेंची डोकेदुखी वाढणार आहे. आगामी निवडणुकीत अटीतटीची लढत असल्यानं शिंदे डॅमेज कंट्रोल कशा पद्धतीने करतात ते पाहणं महत्वाचं आहे.