आगामी स्थानिक स्वराज्य संस्थांच्या निवडणुकांच्या पार्श्वभूमीवर शिवसेना शिंदे गटातील अंतर्गत वाद आता चव्हाट्यावर आला आहे. अहिल्यानगरात वादाची ठिणगी पडली असून, शिर्डी लोकसभेचे संपर्क प्रमुख बाजीराव दराडे यांनी पक्षाला सोडचिठ्ठी दिली आहे. विशेष म्हणजे, हा निर्णय उपमुख्यमंत्री एकनाथ शिंदे यांच्या अकोले दौऱ्याच्या दुसऱ्याच दिवशी घेण्यात आला, ज्यामुळे गटातील मतभेद उघड झाले आहे.

अहिल्यानगर जिल्ह्यात शिवसेना शिंदे गटातील अंतर्गत वाद चव्हाट्यावर आला आहे. एकनाथ शिंदे अकोले दौऱ्यावर होते. अकोले दौऱ्याच्या दुसऱ्याच दिवशी शिर्डी लोकसभेचे संपर्क प्रमुख बाजीराव दराडे यांनी शिवसेनेला सोडचिठ्ठी दिली आहे. अकोले तालुक्यातील आदिवासी ठाकर समाजाचे नेते मारुती मेंगाळ यांनी शिवसेना शिंदे गटात प्रवेश केला होता.

मारूती मेंगाळ यांच्या पक्षप्रवेशानंतर दराडे आणि मेंगाळ यांच्यातील वाद विकोपाला गेला होता. मेंगाळ यांनी पक्ष प्रवेशावेळी बोगस यादी सादर करत पक्षाची दिशाभूल करण्याचा प्रयत्न केला, असा आरोप दराडे यांनी केला होता. मात्र, अकोले येथे आयोजित आदिवासी दिनाच्या कार्यक्रमात एकनाथ शिंदेंनी, मारुती मेंगाळ यांच्या पाठीशी खंबीरपणे उभे असल्याचे म्हटले होते.

दरम्यान, पक्षांतर्गत वादामुळे संपर्क प्रमुख बाजीराव दराडे हे नाराज झाले. त्यांनी शिवसेना शिंदे गटाला जय महाराष्ट्र करण्यासाठी निर्णय घेतला. यानंतर त्यांनी उपमुख्यमंत्री एकनाथ शिंदे यांना थेट राजीनामा पाठवला. दराडे यांनी दिलेल्या राजीनाम्यामुळे त्यांच्यातील उघड नाराजी दिसून आली.