संजय महाजन, साम टीव्ही

लाडकी बहीण योजनेवरून राजकीय नेत्यांमध्ये आरोप-प्रत्यारोप सुरु झाली आहेत. लाडकी बहीण योजनेसाठी इतर विभागाचा निधी इतरत्र वळण्यात आल्याचा आरोप करण्यात आला आहे. सामाजिक न्याय विभागाचा निधी इतरत्र वळवल्याने मंत्री संजय शिरसाट यांनी नाराजी व्यक्त केली होती. आता याच मुद्द्यावरून शरद पवार गटाचे ज्येष्ठ नेते एकनाथ खडसे यांनी महायुती सरकारवर निशाणा साधला आहे. लाडकी बहीण योजनेमुळे सरकार अडचणीत आल्याची टीका एकनाथ खडसे यांनी केली आहे.

लाडकी बहीण योजनेवरून राजकीय वर्तुळात आरोपांची मालिका सुरु झाली आहे. लाडकी बहीण योजनेसाठी सामाजिक न्याय विभाग आणि आदिवासी विभागाचा निधी वळवण्यावरून सरकारला टीकेचा सामना करावा लागला. यावरून सत्ताधारी मंत्र्यांनीही नाराजी व्यक्त केली. आता याच मुद्द्यावरून एकनाथ खडसे यांनी महायुती सरकार अडचणी आल्याची दावा केला आहे. लाडक्या बहिणीमुळे सरकार अडचणीत आलं आहे. निधी कमतरतेमुळे अनेक योजना रखडल्या आहेत. काही योजना रद्द करण्यात आल्या आहेत'.

सामाजिक न्याय विभागाच्या निधीवर भाष्य करताना खडसे म्हणाले, 'सामाजिक विभागाचा निधी आणि मागासवर्गीय विभागाचा निधी हा टप्प्याटप्प्याने लाडक्या बहिणीच्या विभागात वाढवण्यात येत आहे. त्यामुळे या विभागाला फटका बसू शकतो. ही योजना थांबू शकतात आणि फटका बसू शकतो'.

ठाकरे कुटुंब आणि पवार कुटुंब एकत्र येण्याच्या चर्चांवर भाष्य करताना एकनाथ खडसे म्हणाले, 'महाराष्ट्राच्या जनतेतील लोकांचा कौल आजमावण्यासाठी त्यांची चाचणी असेल. आज तरी ठाकरे आणि शरद पवारांचा पक्ष एकत्र आहे. सर्वांची चर्चा करूनच शरद पवार निर्णय घेतील असं मला वाटतं'.

नाशिकच्या कुंभमेळ्यावरही खडसे यांनी भाष्य केलं. 'कुंभमेळा पावणे दोन वर्षे चालावा असं सरकारचं दिसते. सरकार मात्र या कुंभमेळ्यात पैसा कुठून उभा करतोय, याची उत्सुकता लागली आहे, असे ते म्हणाले.