धाराशीवमधून धक्कदायक बातमी समोर आली आहे. शहरात एका बांधकाम व्यावसायिक दुकानात राजकीय वादातून दोन गटात तुंबळ हाणामारी झाली. ही संपूर्ण हाणामारीची घटना सीसीटीव्हीमध्ये कैद झाली आहे. दरम्यान या प्रकरणी कोणताही गुन्हा दाखल करण्यात आलेला नाही.

हाती लागलेल्या दुकानातील सीसीटीव्ही फुटेजनुसार, धाराशिवमधील एका बांधकाम व्यावसायिक दुकानात दुकानदार पृथ्वीराज पाटील यांच्यावर हल्ला झाला. दुकानात बसलेल्या पृथ्वीराज पाटील आणि त्यांच्या सहकाऱ्यांवर एका व्यक्तीने अचानक लोखंडी पट्टीने हल्ला केला. यानंतर पाटील यांच्या गटाने हल्लेखोर तरुणाला जोरदार मारहाण केली. हल्लेखोर आणि दुकानदार दोघेही वेगवेगळ्या पक्षांशी संबंधित कार्यकर्ते असल्याची माहिती समोर आली आहे.

मारामारीचा हा थरार फारच भयानक होता. घडलेली संपूर्ण भयावह घटना बांधकाम व्यावसायिक पृथ्वीराज पाटील यांच्या दुकानात असलेल्या सीसीटीव्हीमध्ये कैद झाली आहे. ही मारामारी नेमकी का झाली? चानक झालेल्या या हल्ल्यामागील नेमके कारण काय? हे अद्याप अस्पष्ट आहे. मात्र हा वाद राजकीय मतभेदातून झाला असावा असा प्राथमिक अंदाज वर्तवण्यात येत आहे.

दरम्यान इतका भीषण हल्ला होऊनही या संदर्भात पोलीस ठाण्यात कोणताही गुन्हा दाखल करण्यात आलेला नाही. शिवाय या मारामारीचे नेमके कारण स्पष्ट झालेले नाही. याप्रकरणी पोलीस दखल घेणार का? हे पाहणं महत्त्वाचं ठरेल. तसेच या घटनेने आजूबाजूच्या परिसरात भीतीचे वातावरण पसरले आहे.