Beed News :

मराठा समाजाला सरसकट आरक्षण मिळावे यासाठी मनोज जरांगे पाटील यांचा सरकार विरुद्धचा लढा सुरूच आहे. याचाच एक भाग म्हणून सकल मराठा समाजाकडून गावागावात महासंवाद बैठकीचे आयोजन केले जात आहे. येत्या 20 मार्च रोजी बीडच्या परळी वैजनाथ येथे अशाच महासंवाद बैठकीचे आयोजन करण्यात आले आहे. मात्र या बैठकीला पोलीस प्रशासनाने परवानगी नाकारलीये. तसेच आयोजकांना पोलिसांनी नोटीस बजावली आहे.

बीडच्या जिल्हाधिकारी दीपा मुधोळ यांनी काढलेल्या आदेशानुसार जिल्ह्यात कसल्याही प्रकारचे जात, भाषा, धार्मिक शिबिरांचे आणि मेळाव्यांचा आयोजनावर निर्बंध घालण्यात आलेले आहेत. याच आदेशाचा दाखला देत पोलीस प्रशासनाने महासंवाद बैठकीला परवानगी नाकारली आहे.

ही बैठक मोंढा मार्केट, हनुमान मंदिरासमोरील मैदानात होणार असून यासाठी कृषी उत्पन्न बाजार समितीची रीतसर परवानगी घेण्यात आली होती. या परवानगीच्या आधारे आयोजकांनी परळी शहर पोलीस ठाण्यात 13 मार्च रोजी महासंवाद बैठकीच्या परवानगीसाठी अर्ज केला होता.

दरम्यान, लोकसभा निवडणुकीच्या पार्श्वभूमीवर जिल्हाधिकारी यांनी काढलेल्या आदेशानुसार आयोजकांनी जातीचा उल्लेख टाळत पुन्हा काल परळी पोलीस प्रशासनाला नवीन अर्ज देत या बैठकीसाठी परवानगी मागितली आहे. जिल्हाधिकारी यांनी काढलेले आदेश आणि लोकसभेची आचारसंहिता यांच्या पार्श्वभूमीवर पोलीस प्रशासनाने या महासंवाद बैठकीला अद्याप परवानगी दिली नाहीये. मात्र ही महासंवाद बैठक घेण्यासाठी मराठा आंदोलक ठाम असल्याचे दिसून येत आहे.