PM Narendra Modi Will visit Maharashtra On 19 January :

भारतातील सर्वात मोठा गृहप्रकल्प असणाऱ्या रे नगरच्या लोकार्पण सोहळ्यासाठी उद्या, शुक्रवारी देशाचे पंतप्रधान नरेंद्र मोदी हे सोलापूर दौऱ्यावर येत आहेत. त्यासाठी प्रशासन सज्ज झाले आहे. रे नगर परिसरामध्ये सुरक्षेच्या दृष्टीने पोलिसांचा तगडा फौजफाटा तैनात करण्यात आलेला आहे. (Latest News)

पंतप्रधान नरेंद्र मोदी (PM Narendra Modi) यांच्या दौऱ्याच्या पार्श्वभूमीवर दौऱ्यासाठी रंगीत तालीम सुद्धा प्रशासनाकडून केली जात असल्याचे चित्र दिसून येत आहे. रे नगर परिसरामध्ये पंतप्रधान नरेंद्र मोदी, मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि उपमुख्यमंत्री अजित पवार यांचे बॅनर झळकू लागले आहेत. तर रस्त्याच्या कडेला आतापासूनच राष्ट्रवादी काँग्रेस, भाजप आणि शिवसेनेचे झेंडे लागले आहेत.

सहा सुसज्ज हेलिपॅड तयार

पंतप्रधान नरेंद्र मोदी यांच्या आगमनाची जय्यत तयारी सोलापूरच्या रे नगर परिसरामध्ये दिसून येत आहे. पंतप्रधान नरेंद्र मोदी यांच्यासाठी विशेष हेलिपॅडची व्यवस्था या ठिकाणी करण्यात आलेली आहे. त्याचबरोबर राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार आणि राज्यपाल यांच्यासाठी सुद्धा हेलिपॅडची व्यवस्था करण्यात आलेली आहे.

एकूण सहा हेलिपॅडची व्यवस्था या ठिकाणी करण्यात आलेली आहे. सुरक्षेच्या दृष्टीने हेलिपॅड परिसरात पोलिसांचा फौजफाटा तैनात करण्यात आलेला आहे.