पिंपरी चिंचवड : शहरातील काही मालमत्ता धारकांनी महापालिकेकडून आकारण्यात येत असलेल्या मालमत्ता कराचा भरणा करण्यात आलेला नाही. त्यांच्या विरोधात पिंपरी चिंचवड महापालिका प्रशासनाने धडक कारवाई करण्याचे पाऊल उचलले आहे. ऐन दिवाळीच्या तोंडावर मालमत्ता कर थकवणाऱ्या नागरिकांविरोधात पिंपरी चिंचवड महापालिकेची धडक कारवाई सुरू करत काही मालमत्ता जप्त केल्या आहेत.

आर्थिक वर्षात महापालिकेकडून वेगवेगळ्या कराची आकारणी करत त्याची वसुली करण्यात येत असते. मात्र काही मालमत्ता धारकांकडून कराचा भरणा न करता रक्कम थकीत ठेवली आहे. पिंपरी चिंचवड महापालिकेकडून अनेकदा थकबाकीदार मालमत्ता धारकांकडून कर भरणाबाबत सूचना देण्यात आल्या होत्या. तरी देखील हा थकबाकीदारांनी कराचा भरणा केला नसल्याने अखेर महापालिकेने कारवाईचे पाऊल उचलले आहे. 

२७ जणांच्या मालमत्ता जप्त 

मालमत्ता कर बुडवणाऱ्या शहरातील जवळपास २७ मालमत्ता पिंपरी चिंचवड महापालिकेने आतापर्यंत जप्त केल्या आहेत. तसेच काही मालमत्तांवर नोटीसी लावून तर काही ठिकाणी पाणीपुरवठा खंडित करून महापालिकेने करबुडव्या नागरिकाविरोधात धडक कारवाई सुरू केली आहे. यामुळे ऐन दिवाळीच्या तोंडावर महापालिकेने कारवाई सुरु केल्याने करबुडव्यांना चांगलाच दणका दिला आहे. 

महापालिकेचे १८ पथक तयार 

मालमत्ता कर वसुलीसाठी पिंपरी चिंचवड महापालिकेने जवळपास १८ पथके तयार केली असून, दिवाळी उत्सवातच थकबाकीदारांकडे वसुलीसाठी पथक रवाना होत आहेत. तर जप्तीची कारवाई टाळण्यासाठी नागरिकांनी थकवलेलं कर भरून कारवाई टाळावी अस आव्हान पिंपरी चिंचवड महापालिकेच्या कर संकलन विभागाने केल आहे.