Summary -

• फलटण शासकीय रुग्णालयातील महिला डॉक्टर आत्महत्या प्रकरणात मोठी अपडेट

• मुख्य आरोपी पीएसआय गोपाल बदनेचं लोकेशन पंढरपूरमध्ये सापडले

• आरोपी प्रशांत बनकरला पुण्यातून पोलिसांनी अटक केली

• दोन्ही आरोपींवर बलात्कार आणि आत्महत्येस प्रवृत्त केल्याचे गंभीर आरोप

अक्षय बडवे, पुणे

साताऱ्यातील फलटण शासकीय रुग्णालयात कार्यरत असलेल्या महिला डॉक्टर आत्महत्या प्रकरणात मोठी अपडेट समोर आली आहे. महिला डॉक्टर आत्महत्या प्रकरणातील मुख्य आरोपी पोलिस उपनिरीक्षक गोपाल बदनेचे लोकेशन सापडले. गोपाल बदने पंढरपूरमध्ये लपून बसला असल्याची माहिती समोर आली आहे. त्याला अटक करण्यासाठी पोलिसांची दोन पथके रवाना करण्यात आली आहे. या प्रकरणात प्रशांत बनकरला पोलिसांनी बेड्या ठोकल्या आहेत. तो पुण्यातील एका फार्म हाऊसवर लपून बसला होता.

मिळालेल्या माहितीनुसार, सातारा पोलिसांकडून पोलिस उपनिरीक्षक गोपाल बदनेचा शोध सुरू आहे. बदनेचे शेवटचे लोकेशन पंढरपूर असल्याचे निष्पन्न झाले आहे. काल सकाळी बदने हा पंढरपूर शहरात असल्याची माहिती होती. बदनेने पंढरपूरमध्ये शेवटचा फोन केला असल्याचे तांत्रिक विश्लेषणातून माहिती समोर आली आहे. बदनेने पंढरपूरमध्ये त्याचा फोन बंद केला होता. फलटण पोलिस त्याला अटक करण्यासाठी प्रयत्न करत आहेत.

महिला डॉक्टरने आत्महत्येपूर्वी लिहिलेल्या सुसाईड नोटमध्ये पोलिस उपनिरीक्षक गोपाल बदने आणि प्रशांत बनकर या दोघांची नावं लिहिली होती. हातावर तिने सुसाईड नोट लिहिली होती. बदने आणि बनकर या दोघांनी मानसिक आणि शारीरिक छळ केल्याचा तसंच बलात्कार केल्याचा उल्लेख या सुसाईड नोटमध्ये करण्यात आला होता. डॉक्टर आत्महत्याप्रकरणी प्रशांत बनकर आणि गोपाल बदने यांच्याविरोधात बलात्कार आणि आत्महत्येस प्रवृत्त केल्याप्रकरणी गुन्हा दाखल आहे. पोलिस दोघांचा शोध घेत होते. एकाला अटक करण्यात आली आहे.

डॉक्टर आत्महत्या प्रकरणातील दोन्ही आरोपी डॉक्टरच्या आत्महत्येनंतर फरार झाले होते. या प्रकरणात आज पहाटे पहिली अटक करण्यात आली. प्रशांत बनकरला सातारा पोलिसांनी पुणे शहरात असलेल्या एका फॉर्म हाऊसमधून ताब्यात घेतलं. त्यानंतर फलटण पोलिस ठाण्यात प्रशांत बनकरला हजर करण्यात आले असून त्याला अटक केली जाणार आहे. डॉक्टर आत्महत्ये प्रकरणामुळे राज्यात खळबळ उडाली आहे.