- सुशिल थाेरात

Karjat Jamkhed News : कर्जत जामखेड एमआयडीसी (Karjat Jamkhed MIDC) प्रकरणाला आता एक वेगळेच वळण लागल्याचे चित्र आहे. या एमआयडीसीला पाटेगाव ग्रामस्थांनी विरोध दर्शविला आहे. ग्रामस्थांचा हा विराेध आमदार रोहित पवार (mla rohit pawar) यांना मोठा धक्का मानला जात आहे. (Maharashtra News)

कर्जत जामखेड (karjat jamkhed news) तालुक्यातील एमआयडीसी करण्याबाबत सध्या चांगलाच राजकीय धुरळा उडाला. या एमआयडीसीच्या प्रश्नाबाबत कर्जत जामखेडचे राष्ट्रवादीचे आमदार रोहित पवार चांगलेच आक्रमक झाले आहेत. या एमआयडीसीच्या प्रश्नांसाठी त्यांनी थेट मंत्रालयाच्या बाहेर उपोषणही सुरू केले होते. मात्र उद्योगमंत्री उदय सामंत (uday samant) यांनी आश्वासन दिल्यानंतर हे उपोषण मागे घेण्यात आले.

त्यानंतर या प्रकरणात विधान परिषदेचे आमदार राम शिंदे (mla ram shinde) यांनीही उडी घेतली. राम शिंदे हे कर्जत जामखेडचे माजी आमदार असून एमआयडीसी प्रश्नाबाबत बोलत असताना एमआयडीसीची अधिग्रहण करण्यात येणारी ही जमीन फरार हिरे व्यापारी निरव मोदीची असल्याचा गौप्यस्फोट केला.

त्यामुळे या प्रकरणात पुन्हा एकदा चांगला राजकीय गदारोळ झाला होता. ही चर्चा क्षमते नाही तोच आता ज्या ठिकाणी एमआयडीसीची उभारणी होणार आहे त्या पाटेगाव परिसरामधील नागरिकांनी या एमआयडीसी उभारण्यास विरोध (pategaon grampachayat opposes karjat jamkhed midc project) केला आहे.

तुटपुंजा मोबदला कशासाठी घ्यावा

पाटेगाव परिसरातील अनेक शेतांमध्ये फळांच्या बागा असल्याने या परिसरात चांगले उत्पन्न होत आहे. त्यामुळे चांगली जमीन देऊन जर सरकार आम्हाला तुटपुंजा मोबदला देत असतील तर आम्हाला पैसे नको अशी भूमिका गावकऱ्यांनी घेतली आहे.

मर्यादित राेजगार मिळेल

एमआयडीसी आल्याने उद्योग धंद्या वाढीबरोबर तरुणांना रोजगार मिळेल. त्यामुळे एमआयडीसी होणे गरजेचे असल्याचे आमदार रोहित पवार सांगत असले तरी या परिसरातील अनेक तरुण दहावी ते बारावी पास असून त्यापेक्षा कोणीही उच्च शिक्षित नसल्याने एमआयडीसी झाली तरी येथील तरुणांना कामाची संधी कमी प्रमाणात भेटेल. त्यामुळे आम्हाला आमची शेती चांगली आहे. आम्हाला एमआयडीसीचे काम नको अशी भूमिका पाटेगाव मधील तरुणांनी व्यक्त केले आहे.

पाटेगावलाच व्हावी म्हणुन हट्ट करणा-या आमदार रोहीत पवारांना हा मोठा धक्का असून पाटेगाव ग्रामस्थांनी (villagers) ग्रामसभा घेत पाटेगावमध्ये एमआयडीसीला विरोध करत एकमताने ठराव मंजुर केला आहे.

पाटेगाव ग्रामपंचायतीत नऊ सदस्य आहेत. त्यामधील पाच सदस्यांनी एमआयडीसी विरोधात मत दर्शवले आहे तर चार सदस्यांनी आपली भूमिका जाहीर केली नाही. सरपंच सुद्धा एमआयडीसी होण्याच्या विरोधात नसल्याने गावात दोन गट असल्याचे समोर आले आहे.

त्यामुळे अगोदरच नीरव मोदीच प्रकरण गाजत असताना पाटेगाव ग्रामस्थांच्या भुमिकेमुळे नवीन अडचण निर्माण झाली आहे. त्याच प्रमाणे आमदार रोहीत पवार समर्थकांनीही ठरावाला संमती दिल्याने पाटेगाव एमआयडीसी प्रकरणाला वेगळच वळण लागलं आहे.

Edited By : Siddharth Latkar