राजेश काटकर, परभणी

ऑनलाइन फ्रॉडच्या अनेक घटना आतापर्यंत समोर आल्या आहेत. त्यामुळे वारंवार नागरिकांनी सावध राहण्याचे आवाहन केले जात आहे. ऑानलाइन फ्रॉडच्या माध्यमातून चांगल्या सुशिक्षित लोकांची देखील लूट केली जात आहे. अशामध्ये परभणीमध्ये कुलगुरूच ऑनलाइन फ्रॉडचे शिकार झाले आहेत. कुलगुरूंना तब्बल ११ लाखांचा गंडा घालण्यात आला आहे. याप्रकरणी अज्ञात व्यक्तीविरोधात गुन्हा दाखल करण्यात आला आहे.

मिळालेल्या माहितीनुसार, अज्ञात व्यक्तीने मोबाइलवर फ्रॉड लिंक पाठवून बँक खात्याची माहिती घेत कुलगुरूंची फसवणूक केली आहे. वसंतराव नाईक मराठवाडा कृषी विद्यापीठाचे कुलगुरू डॉ. इंद्र मणी यांची १० लाख ९९ हजार रुपयांची फसवणूक झाली आहे. याप्रकरणी अज्ञात मोबाइल वापरकर्त्यावर नवा मोंढा पोलिस ठाण्यात फसवणुकीचा गुन्हा दाखल करण्यात आला आहे. पोलिस सध्या याप्रकरणाचा तपास करत आहेत.

वसंतराव नाईक मराठवाडा कृषी विद्यापीठाचे कुलगुरू डॉ. इंद्र मणी हे घरी काम करत होते. यावेळी एका अज्ञात व्यक्तीने त्यांना फ्रॉड लिंक पाठवली. त्यानंतर केवायसी डिटेल्स पाठवून ती देखील भरून मागवून घेतली. सर्व माहिती प्राप्त होताच डॉ. मणी यांच्या बँक खात्यातून १० लाख ९९ हजार रुपये काढून घेत त्यांची फसवणूक करण्यात आली. आपली फसवणूक झाल्याचे लक्षात येताच इंद्र मणी यांनी नवा मोंढा पोलिस ठाण्यात धाव घेत याप्रकरणी तक्रार दाखल केली. या तक्रारीनंतर पोलिसांनी अज्ञात व्यक्तीविरोधात गुन्हा दाखल करत तपास सुरू केला आहे.