Parabhani News : जिंतूर तालुक्यातील भोगाव देवी येथे इयत्ता दहावीच्या परीक्षा देणाऱ्या शाळकरी मुलीने स्वत:च्या घरात गळफास लावून आत्महत्या केल्याची घटना घडली आहे. शुक्रवारी दुपारच्या सुमारास ही घटना घडली. पोलिसांनी घटनास्थळी दाखल होऊन प्राथमिक पंचनामा केला आहे.

मिळालेल्या माहितीनुसार भोगाव देवी येथील शेतकरी विलास साखरे यांची मुलगी शीतल विलास साखरे वय 16 ही जिल्हा परिषद शाळा भोगाव देवी येथे शिक्षण घेत होती. तिने गुरुवारी दहावीचा पेपर देखील दिला होता. शुक्रवारी पेपर नसल्याने ती घरात पुढील पेपरचा अभ्यास करत होती. (Latest Marathi News)

दरम्यान दुपारी तीनच्या सुमारास घरात एकटीच असताना तिने छताच्या पंख्याला साडी बांधून गळफास घेतला. ही घटना समोर येताच गावकऱ्यांनी तात्काळ पोलीसांना याची माहिती दिली. त्यानंतर पोलीस घटनास्थळी दाखल झाले आणि ग्रामस्थांच्या मदतीने लटकलेला शीतलचा देह काढून प्राथमिक पंचनामा केला.

शीतलला ग्रामीण रुग्णालयात दाखल केले असता वैद्यकीय अधिकारी डॉ. श्रोती कोडगीरे यांनी तपासून मृत घोषित केले. दरम्यान परीक्षेच्या मानसिक त्रासामुळे तिने आत्महत्या केल्याचे बोलले जात आहे. या प्रकरणी जिंतूर पोलीस पुढील तपास करत आहेत.