पंढरपुरातील हॉटेलमध्ये घरगुती गॅसचा स्फोट झाल्याकारणाने दोन चिमुकल्या मुलींचा दुर्देवी मृत्यू झाला आहे. तर, दोन जण गंभीर असल्याची माहिती आहे. प्राथमिक माहितीनुसार, हॉटेलमध्ये खाद्य पदार्थ तयार करत असताना गॅस पाईपमधून लिकेज झाला. यामुळे स्फोट झाल्याची माहिती आहे. जखमींवर सध्या रूग्णालयात उपचार सुरू आहे. या घटनेची मंगळवेढा पोलिस ठाण्यात नोंद करण्यात आली आहे.

मंगळवेढातील नंदेश्वर येथील एका हॉटेलमध्ये हा भयानक प्रकार घडला. खाद्य पदार्थ तयार करत असताना अचानक गॅस पाईप लिकेज झाली. लिकेज झाल्यामुळे भीषण स्फोट झाला. या स्फोटात ४ जण आगीच्या विळख्यात सापडल्याची माहिती आहे. आगीच्या कचाट्यात २ चिमुकल्या मुलींचा जागीच मृत्यू झाला. आगीत भाजल्यामुळे त्यांनी जागीच प्राण सोडले.

श्रेया दादासाहेब गंगथडे आणि स्वरा दादासाहेब गंगथडे असे मृत चिमुकल्या मुलींचे नाव आहे. तर, दादासाहेब आणि मोनाली गंगथडे हे गंभीर जखमी झाले आहेत. अपघात घडल्यानंतर त्यांना तातडीने सोलापुरातील रूग्णालयात उपचारासाठी हलवण्यात आले. तसेच मृतदेह शवविच्छेदनासाठी पाठवण्यात आले आहे.=

या घटनेची माहिती मिळताच मंगळवेढा पोलिसांनी तातडीने घटनास्थळी धाव घेतली. तसेच मंगळवेढा पोलिस ठाण्यात नोंद करण्यात आली आहे. हा स्फोट नेमका कसा घडला? स्फोट घडण्यापूर्वी नेमकं काय घडलं? याचा तपास पोलिसांकडून सुरू आहे. या घटनेनंतर परिसरातील नागरिकांनी हळहळ व्यक्त केली आहे.