Pandharpur News:

पंढरपूर शहरात सध्या तीव्र पाणीटंचाई निर्माण झाली आहे. या पाणीटंचाईमुळे शहरात एक दिवस आड पाणीपुरवठा केला जात आहे. अशातच आता ड्रेनेजचे पाणी पात्रात सोडून त्यावर प्रक्रिया करण्यात येत आहे. त्यानंतर ते पिण्यासाठी वापरले जात असल्याचा धक्कादायक प्रकार समोर आला आहे. याबाबतचा एक व्हिडिओ सोशल मीडियामध्ये प्रचंड व्हायरल झाला आहे. (Latest Marathi News)

पंढरपुरात थेट ड्रेनेजचे पाणी नदी पात्रात सोडून ते पिण्यासाठी वापरले जात असल्याचे दिसून आले आहे. यामुळे पंढरपूर शहरातील नागरिकांकडून आता तीव्र संताप व्यक्त केला जात आहे. याबाबतचा एक व्हिडिओ सध्या सोशल मीडियामध्ये प्रचंड व्हायरल झाल्यानंतर ही बाब समोर आली आहे.

काय आहे प्रकरण?

पंढरपूर शहराच्या उपनगरातून ड्रेनेजचे पाणी चंद्रभागेच्या पात्रात सोडले जाते. पुढे याच पाण्याचा शहाराला पुरवठा होतो. तेच पाणी शहरातील नागरिकांना तसेच वारकरी भाविकांना शुद्धीकरण करून एक दिवसाआड दिले जात असल्याचा धक्कादायक प्रकार समोर आला आहे.

माजी नगरसेवक किरण घाडगे, नगरसेवक प्रशांत शिंदे, सामाजिक कार्यकर्ते सुरज पावले यांनी प्रत्यक्ष पाहणी करून व्हिडिओ तयार करून सोशल मीडियावर व्हायरल केला आहे.

नागरिकांना पुरवठा होणाऱ्या पाण्याचा वास येत असल्याने काही सामाजिक कार्यकर्त्यांनी पिण्याच्या पाण्याची चौकशी केली असता हा किळसवाणा प्रकार समोर आला आहे.

दरम्यान, या जीवघेण्या प्रकारामुळे अनेकांना साथीचे आजार, त्वचारोग होण्याची शक्यता व्यक्त करण्यात येत आहे.