पालघर : पालघरच्या वाडा तालुक्यातील नेहरोली येथे मागील आठवड्यात बंद घरात तिघांचा मृतदेह आढळून आल्याची धक्कादायक घटना समोर आली होती. दरम्यान या तिहेरी हत्याकांडाचा उलगडा करण्यात पालघर पोलिसांना यश आले असून भाडेकरू असलेल्या व्यक्तीनेच पैशांसाठी घर मालकाचा खून केल्याची माहिती समोर आली आहे. 

पालघरच्या (Palghar) वाडा तालुक्यातील नेहरोली येथे मागील आठवड्यात मुकुंद राठोड त्यांची पत्नी कांचन राठोड आणि मुलगी संगीता राठोड या तिघांचा मृतदेह बंद घरात आढळून आल्याने एकच खळबळ उडाली होती. सदर प्रकरणाचा पोलिसांकडून (Police) तपास सुरु असताना या प्रकरणात याच राठोड कुटुंबीयांकडे भाडेकरू म्हणून राहणाऱ्या उत्तर प्रदेशातील आरिफ अन्वर अली यानेच सदर कृत्य केल्याचे तपासात निष्पन्न झाले आहे. या संशयित आरोपीला पालघर पोलिसांनी उत्तर प्रदेशातून अटक केली आहे. 

पैशांसाठी तिघांना संपविले 

घर मालकांकडे पैसे असतील, त्यातून त्याने चोरी करण्याचा प्लॅन आखला. चोरीच्या उद्देशाने अन्वर याने तिघांचीही (Crime News) डोक्यात हातोडा घालून निघृण हत्या केल्याचं उघड झाले आहे. तसेच हत्येनंतर तो उत्तर प्रदेशात पसार झाला होता. मात्र या सगळ्या तपासात पालघर पोलिसांना ठाणे येथील श्वानपथकाने विशेष मदत केली असून सध्या आरोपीला अटक करण्यात आली आहे. तसेच ताब्यात घेण्यात आलेल्या संशयितांसोबत आणखीन कोणी या हतेच्या कटात सामील होतं का? याचा तपास सध्या पालघर पोलिसांकडून केला जात आहे.