आगामी स्थानिक स्वराज्य संस्थांच्या निवडणुकांसाठी अवघे काही महिने शिल्लक असताना राजकीय घडामोडींना वेग आला आहे. या पार्श्वभूमीवर पालघरमध्ये भाजपकडून शिवसेना शिंदे गटाला मोठा धक्का बसला आहे. शिवसेना शिंदे गटाचे माजी जिल्हा परिषद अध्यक्ष प्रकाश निकम भाजपमध्ये प्रवेश करणार आहेत. त्यामुळे भाजप पक्ष अधिक बळकट होणार असल्याचं बोललं जात आहे.

पालघरमध्ये भाजपकडून शिवसेना शिंदे गटाला धक्का बसला आहे. शिवसेना शिंदे गटाचे माजी जिल्हा परिषद अध्यक्ष आणि विधानसभेचे बंडखोर उमेदवार प्रकाश निकम आज भाजप पक्षात जाहीर प्रवेश करणार आहेत. आज मोखाड्यातील प्रमुख पदाधिकाऱ्यांसह भाजपचं कमळ हाती घेणार आहेत.

प्रकाश निकम यांच्यासोबत युवा सेना जिल्हाप्रमुख रिकी रत्नाकर देखील भाजपमध्ये प्रवेश करणार असल्याची माहिती आहे. तसेच जव्हार मोखाड्यातील बडे नेते जिल्हा परिषद सदस्य आणि पंचायत समिती सदस्य देखील पक्षप्रवेश करणार आहेत. या पक्षप्रवेशामुळे भाजपची ताकद वाढणार आहे.

भाजपमध्ये पक्षप्रवेश करण्यासाठी निकम आपल्या प्रमुख पदाधिकारी आणि कार्यकर्त्यांसह मुंबईच्या दिशेनं रवाना झाले आहेत. भाजपचे प्रदेशाध्यक्ष रवींद्र चव्हाण यांच्या उपस्थितीत हा पक्षप्रवेश सोहळा भाजप कार्यालयात पार पडणार आहे. बंडखोरी करताना पक्षाशीच गद्दारी करणाऱ्या निलेश सांबरे यांना शिवसेना शिंदे गटात प्रवेश दिल्याने प्रकाश निकम नाराज असल्याची चर्चा होती. त्यामुळे त्यांनी भाजप पक्षात जाण्याचा निर्णय घेतला असल्याचं बोललं जात आहे.