रुपेश पाटील, पालघर

Palghar Accident News : मुंबई-अहमदाबाद राष्ट्रीय महामार्गावर पालघरमधील मनोर पोलीस ठाण्याच्या हद्दीत सातिवली येथे भीषण अपघात झाला. महामार्गावर उभ्या असलेल्या ट्रकला भरधाव दुचाकीने मागून धडक दिली. या अपघातात दुचाकीवरील तिघांचा जागीच मृत्यू झाला. (Latest Marathi News)

मुंबई-अहमदाबाद राष्ट्रीय महामार्गावर पालघर जिल्ह्यातील मनोर पोलीस ठाण्याच्या हद्दीत हा अपघात झाला. सातिवलीजवळ काल रात्रीच्या सुमारास उभ्या असलेल्या ट्रकला भरधाव दुचाकीने जोरदार धडक दिली. हा अपघात इतका भीषण होता की, दुचाकीवरील तिघेही जागीच ठार झाले.

मिळालेल्या माहितीनुसार, दुचाकीवरून तिघे जण घरी परतत होते. नरेश लाडक्या भोईर (वय २२, रा. करसोड), सूरज राघ्या ठाकरे ( वय १८, रा. डोल्हारी बुद्रुक), मयूर विनोद ठाकरे ( वय 17, डोल्हारी बुद्रुक) अशी तिघांची नावे आहेत.

या अपघातात तिघांचाही मृत्यू झाला. तिघेही विक्रमगड तालुक्यातील रहिवासी होते. वसईच्या एका कारखान्यात ते काम करत होते. वसईतील कारखान्यातून सुट्टी झाल्यावर तिघेही घरी जात होते. त्याचवेळी हा भीषण अपघात झाला.

तुमसर-भंडारा राज्यमार्गावरही कार-ट्रक अपघात, ४ जखमी

तुमसर- भंडारा राज्यमार्गावरील खरबी शेत शिवारात एका कारला कोळशाची वाहतूक करणाऱ्या ट्रकने समोरून जोरदार धडक दिली. या अपघातात चार जण जखमी झाले असून, कारमधील दहा जण थोडक्यात बचावले.

ही घटना रविवारी रात्री १० वाजण्याच्या सुमारास घडली. अपघातानंतर चालक ट्रकसह पसार झाल्याची माहिती आहे. कारच्या समोरच्या भागाचा चेंदामेंदा झाला. मोहाडी पोलिसांनी या घटनेची नोंद केली आहे. तसेच संबंधितावर गुन्हा दाखल केला असून ट्रकचालकाचा शोध घेण्यात येत आहे.