व्होटचोरीच्या मुद्द्यावर निवडणूक आयोगाविरोधात विरोधकांनी एकीची वज्रमूठ आवळली.. मात्र या मोर्चात चर्चेच्या केंद्रस्थानी राहिले ते म्हणजे ठाकरे बंधू... आणि त्याची चर्चा सुरु झाली ती राज ठाकरेंनी मोर्चाला जाण्यासाठी लोकलच्या निवडलेल्या पर्यायामुळे... राज ठाकरे दादरहून चर्चगेट लोकलने मोर्चासाठी पोहोचले..

मात्र थेट मोर्चाच्या ठिकाणी जाण्याआधी राज ठाकरे हॉटेलवरच उद्धव ठाकरेंची वाट पाहत थांबले... एवढंच नाही तर उद्धव ठाकरेंसोबत तब्बल तासभर बंद दाराआड चर्चा करत रणनीती ठरवली आणि दोघे भाऊ एकत्रच रस्त्यावर उतरले... याच ठाकरे बंधूंच्या एकीने सगळ्यांचंच लक्ष वेधून घेतलं.. तर आम्ही तुमच्यासाठी एकत्र आलो आहोत, असं म्हणत उद्धव ठाकरेंनी कार्यकर्त्यांना साद घातलीय..

विरोधकांच्या मोर्चात ठाकरे फक्त एकत्रच दिसले नाहीत.. तर दोघांनीही आक्रमक भूमिका घेत दुबार आणि तिबार मतदान करणाऱ्यांना बडवण्याचा इशारा दिलाय... खरंतर राज ठाकरे आणि उद्धव ठाकरेंनी हिंदीसक्तीविरोधात एकीची वज्रमूठ आवळली.. त्यानंतर 4 महिन्यात ठाकरे 10 वेळा एकत्र आलेत... त्यामुळे महायुतीला धडकी भरलीय.. आता व्होटचोरीचा मुद्दा काँग्रेसच्या हातातून निसटून ठाकरे बंधूंच्या हातात गेलाय. त्यामुळे महापालिका निवडणुकीत व्होटचोरीचा मुद्दा ठाकरे बंधूंसाठी फायद्याचा ठरणार का? याकडे राज्याचं लक्ष लागलंय..