राज्यात मराठी हिंदी भाषक वाद सुरू असतानाच या वादाची ठिणगी राज्याच्या राजकारणात पडली. अमराठी नेत्यांनीही या वादात उडी घेतली. ठाकरे बंधूंचा विजयी मेळावा पार पडल्यानंतर भाजपचे खासदार निशिकांत दुबे यांनी वादग्रस्त वक्तव्य केलं. त्यांच्याविरोधात संतापाची लाट उसळली आहे. महाराष्ट्राविषयी गरळ ओकणाऱ्या आणि मराठी माणसाला धमकी देणाऱ्या याच दुबेंनी मात्र, मुंबईत नोकरी केलीय. याशिवाय याच महाराष्ट्राची मायानगरी असलेल्या मुंबईत कोट्यवधींची प्रॉपर्टीदेखील आहे.

भाजप खासदार निशिकांत दुबे यांनी मराठी विरोधात आगपाखड करताना केवळ ठाकरेंनाच आव्हान दिलेलं नाही तर महाराष्ट्रातील १३ कोटी मराठी माणसाच्या अस्तित्वालाच डिवचलं आहे, अशा मराठी माणसाच्या भावना आहेत. हिंदीसक्ती विरोधात महाराष्ट्रातील कानाकोपऱ्यातील माणूस पेटून उठला. मराठीवरून एकी झाल्यानं महाराष्ट्रातील अमराठी नेत्यांच्या पोटात दुखू लागलंय, असं चित्र निर्माण झालं आहे.

"हिंदी भाषकांना मुंबईत मारणाऱ्यांनो, जर हिंमत असेल तर महाराष्ट्रात उर्दू भाषिकांना मारून दाखवा. मराठी भाषक आमच्याच पैशांवर जगतात, असं वक्तव्य दुबे यांनी केलं होतं. महाराष्ट्र, मराठी माणूस आणि मुंबईविषयी गरळ ओकणारे हेच निशिकांत दुबे सुरुवातीच्या काळात मुंबईतच राहिल्याचे बोलले जात आहे. मुंबईतील खार पश्चिमेला त्यांचं आलिशान घर असल्याचं समोर आलं आहे. दुबेंच्या मुंबईतील घराची सध्याची किंमत २ कोटींहून अधिक असल्याचे सांगितले जाते. महाराष्ट्राकडे स्वतःच काय आहे असं म्हणणारे भाजप खासदार निशिकांत दुबे गेली १६ वर्षे मुंबईतील उच्च्भ्रू सोसायटीत राहत आहेत.

धक्कादायक म्हणजे महाराष्ट्रात कोणतेही उद्योग नाही, असे म्हणणाऱ्या दुबे १९९३ ते २००९ साली मुंबईत एका बड्या कंपनीत संचालक पदावर कार्यरत होते. २००९ मध्ये दुबे यांनी निवडणूक लढवताना प्रतिज्ञापत्रात खार येथील ज्युलेलाल सोसायटीतील फ्लॅटचा सविस्तर उल्लेख केला होता. दुबे यांचे मुंबई कनेक्शन उघड झाल्यावर राज्याच्या राजकारणात कोणती नवी चर्चा सुरु होणार हे पाहणं महत्त्वाचं ठरेल.