सांगली : सांगली (sangli) जिल्ह्यातील मिरज (miraj) तालुक्यातील म्हैसाळ (mhaisal) येथे एकाच कुटुंबातील ९ जणांनी आत्महत्या केल्याची घटना घडली आहे. या घटनेची माहिती समजताच पोलीस (police) घटनास्थळी पाेहचले. या घटनेची माहिती समजताच जिल्हा पोलीस अधिक्षक यांनी देखील घटनास्थळी भेट देत तपासाची चक्रे फिरवली. (mhaisal latest marathi news)

नरवाड रोड अंबिका नगर चौंडजे मळा आणि हॉटेल राजधानी कॉर्नर या दोन ठिकाणी एकाच कुटुंबातील नऊ जणांचे घरात मृतदेह आढळून आल्याने परिसरात एकच खळबळ उडाली. पशु वैद्यकीय डॉक्टर डॉ. माणिक यल्लप्पा वनमोरे (dr manik vanmore) आणि त्यांचा शिक्षक भाऊ पोपट यल्लप्पा वनमोरे (popat vanmore) या दोघांच्या आई, पत्नी आणि मुलांचा मृतांत समावेश आहे. पाेलीसांनी दिलेल्या माहितीनूसार वनमोरे यांच्या कुटुंबाने आर्थिक कारणावरून विष प्राशन करून आत्महत्या केली असावी अशी शक्यता आहे. या घटनेचा तपास सुरु आहे. घटनास्थळी स्थानिकांची माेठ्या प्रमाणात गर्दी झालेली आहे.

पाेलीसांनी सांगितले डॉ. माणिक यल्लप्पा वनमोरे, पत्नी रेखा माणिक वनमोरे , आई आक्काताई यल्लप्पा वनमोरे, मुलगी प्रतिमा माणिक वनमोरे , मुलगा आदित्य माणिक वनमोरे, पुतण्या शुभम पोपट वनमोरे तसेच राजधानी हॉटेल जवळ दुसऱ्या घरात डॉ माणिक यांचा भाऊ पोपट यल्लप्पा वनमोरे, संगीता पोपट वनमोरे, मुलगी अर्चना पोपट वनमोरे यांचे मृतदेह घरात आढळून आले आहेत.

दरम्यान घटनास्थळी पोलीस अधीक्षक दीक्षित कुमार गेडाम, उपविभागीय पोलीस अधीक्षक अशोक वीरकर, पोलीस निरीक्षक चंद्रकांत बेंदरे हे घटनास्थळी तसेच परिसरात चाैकशी करीत आहेत.

Edited By : Siddharth Latkar