संजय गडदे,साम टीव्ही प्रतिनिधी

मुंबई : लोकसभा निवडणुकीत महाविकास आघाडीचे उमेदवार निलेश लंके यांनी महायुतीचे उमेदवार सुजय विखे यांचा दारुण पराभव केला. या निवडणुकीच्या प्रचारादरम्यान, सुजय विखेंनी निलेश लंके यांना इंग्रजी बोलून दाखवण्याचं आव्हान केलं होतं. त्यानंतर निवडणूक जिंकताच निलेश लंके यांनी इंग्रजी भाषेवरून सुजय विखे यांना प्रत्युत्तर दिलं होतं. आता पुन्हा एकदा निलेश लंके यांनी उद्धव ठाकरेंच्या भेटीनंतर इंग्रजीच्या भाषेवरून सुजय विखे यांना सणसणीत टोला लगावला आहे.

निलेश लंके हे मुंबई दौऱ्यावर आहेत. या मुंबई दौऱ्यादरम्यान, निलेश लंके यांनी उद्धव ठाकरेंची भेट घेतली. या भेटीनंतर निलेश लंके यांनी माध्यमांशी संवाद साधताना म्हणाले की, 'बाळासाहेब ठाकरे यांचं एक वाक्य आठवतं. ८० टक्के समाजकारण, २० टक्के राजकारण... बाळासाहेब ठाकरेंची प्रेरणा घेऊन राजकारणाचा प्रवास सुरु केला होता. शिवसेनेत शाखाप्रमुख, गटप्रमुख, तालुकाप्रमुख असे पद भूषवलं. मी खासदार झाल्याने उद्धव ठाकरेंनाही आनंद झाला. विधानसभा निवडणुकीत नगरच्या १२ पैकी १२ जागा निवडून आणण्याचा निर्धार केला आहे. या संदर्भात ठाकरेंशी देखील बोललो आहे'.

'महाविकास आघाडीच्या एवढ्या जागा निवडून आल्या. त्याचा त्यांना खूप आनंद झाला आहे. उद्धव ठाकरेंना व्यग्र कामांमुळे नगरमध्ये प्रचाराला येता आलं नाही. मात्र, आदित्य ठाकरे आणि इतर नेत्यांनी माझा प्रचार केला. विधानसभा किंवा मेळावा होईल, त्यावेळी पहिला मेळावा नगरमध्ये घेऊ असं त्यांनी मला सांगितलं आहे, असे लंके म्हणाले.

भाजप नेते सुजय विखे यांच्या निवडणूक आयोगातील तक्रारीवर बोलताना लंके म्हणाले, 'काही लोकांना त्यांचा पराभव मान्य झालेल नाही. त्यामुळे असे रिकामे उद्योग करत असतात. त्यांना जे काम करायचे ते करू द्या'. तर इंग्रजी भाषेवरून बोलताना लंके म्हणाले, 'राज्यातील सर्वसामान्यांना कळणारी भाषा मराठी आहे. त्यामुळे मी त्यातूनच माझे काम करतो'.