विकास मिरगणे

नवी मुंबई : परवानगी नसतानाही आंदोलनाची घोषणा आणि त्यासाठी जमाव करणे, यासह शासनाच्या नियमांचे उल्लंघन प्रकरणी नवी मुंबई विमानतळ नामकरण मागणीसाठी सिडकोला घेराव घालणाऱ्या सर्वपक्षीय समितीच्या प्रमुख पदाधिकाऱ्यांसह आजी-माजी आमदार खासदार व हजारो आंदोलकांवर एनआरआय पोलीस ठाण्यात गुन्हा दाखल करण्यात आला आहे. New Mumbai International Airport Naming Agitation Cases Registered Against Protesters

या आंदोलनाला १८ ते २० हजार आंदोलक उपस्थित असल्याचा पोलिसांचा अंदाज असून त्यांच्यावरही गुन्हा दाखल केला आहे. यात ४ माजी खासदार, २ माजी मंत्री, ७ आमदार, २ माजी आमदार, नवी मुंबईचे महापौर आणि उपमहापौर, पनवेलचे महापौर आणि उपमहापौर यांचा देखील समावेश आहे.

हे देखील पहा -

नवी मुंबई विमानतळाच्या नामकरणाचा मुद्दा मोठ्या वादाचा विषय ठरला असून दि. बा. पाटील यांचेच नाव विमानतळाला द्यावे, यासाठी गुरुवारी सिडकोला घेराव घालण्याचे आंदोलन भूमिपुत्रांनी केले. यावेळी हजारोंच्या संख्येने आंदोलक नवी मुंबईत दाखल झाले होते. त्यामुळे विविध कायद्याचे उल्लंघन झाल्याने गुन्हे दाखल झाले आहेत. असे, एनआरआय पोलीस ठाण्याचे वरिष्ठ निरीक्षक रवींद्र पाटील यांनी सांगितले.

कृती समितीचे अध्यक्ष दशरथ पाटील, उपाध्यक्ष माजी खासदार रामशेठ ठाकूर, माजी खासदार जगन्नाथ पाटील, माजी मंत्री रविंद्र चव्हाण, हुसेन दलवाई, रवीशेठ पाटील, माजी खासदार डॉ. संजीव नाईक, कार्याध्यक्ष आ. प्रशांत ठाकूर, आ. महेश बालदी, आ. गणपत गायकवाड, आ. राजू पाटील, आ. किसन कथोरे, आ. रमेश पाटील, आ. मंदा म्हात्रे, माजी आ. सुभाष भोईर, माजी आ. संदीप नाईक, माजी आ. योगेश पाटील, नवी मुंबईचे महापौर जयवंत सुतार यांच्यासह इतर नेते व जवळपास १८ ते २० हजार आंदोलकांवर गुन्हे दाखल झाले आहेत.

Edited By : Krushnarav Sathe