शुभम देशमुख, साम टीव्ही

NEET परीक्षेच्या निकालाच्या भीतीने एका २१ वर्षीय तरूणाने आयुष्य संपवलं आहे. ही ह्रदयद्रावक घटना भंडाऱ्यातील तुमसर तालुक्यातील हसाराटोली गावात घडली आहे. युवक गेल्या काही महिन्यांपासून NEET परिक्षेची तयारी करत होता. या वर्षीचा निकाल शनिवारी लागणार असल्यानं तो प्रचंड तणावात होता. भीतीच्या भरात तरूणाने टोकाचं पाऊल उचललं. याप्रकरणी गुन्हा नोंद करण्यात आला असून, पुढील तपास पोलिसांकडून सुरू आहे.

अमित रमेश बिसने असे आत्महत्या केलेल्या युवकाचे नाव आहे. तो मागील काही महिन्यांपासून वैद्यकीय प्रवेशासाठी आवश्यक असलेल्या NEET परीक्षेची तयारी करत होता. या वर्षीचा निकाल शनिवारी, १४ जून रोजी लागणार असल्याने तो प्रचंड तणावात होता, अशी माहिती त्याच्या कुटुंबीयांनी दिली.

वडील रमेश बिसने दिलेल्या माहितीनुसार, मागील वर्षी अमितला NEET मध्ये ५९६ गुण मिळाले होते. यंदा अपेक्षित यश मिळणार नाही, या भीतीने तो मानसिकदृष्ट्या खचला होता. या भीतीच्या भरात त्याने गळफास लावून आपले आयुष्य संपवले असावे, असा अंदाज त्यांनी व्यक्त केला आहे.

घटनेच्यावेळी अमित घरी एकटाच होता. त्याने घरातील सिलिंग फॅनला दोरी लावून आत्महत्या केली. काही वेळाने कुटुंबीय घरी आल्यानंतर हा धक्कादायक प्रकार समोर आला. त्यांनी तात्काळ पोलिसांना याची माहिती दिली. या प्रकरणी तुमसर पोलीस स्टेशनमध्ये भारतीय नागरी सुरक्षा संहिता कलम १९४ अंतर्गत गुन्हा नोंद करण्यात आला आहे. पोलीस अधिक तपास करत आहेत. या घटनेनंतर परिसरात हळहळ व्यक्त करण्यात येत आहे.