रणजित माजगावकर, कोल्हापूर

कोल्हापूरच्या राजकारणातून मोठी बातमी समोर आली आहे. राष्ट्रवादी काँग्रेस शरद पवार गटातील समरजीत सिंह घाटगे हे पुन्हा भाजपमध्ये प्रवेश करणार आहेत. येत्या ८ एप्रिल रोजी मुंबईत भाजपमध्ये प्रवेश करणार असल्याची माहिती समोर आली आहे. दरम्यान या पक्ष प्रवेशाने कोल्हापूरच्या राजकारणात मोठा भूकंप येणार असून शरद पवार गटाला हा मोठा धक्का मानला जात आहे.

मागील विधानसभा निवडणुकीवेळी समरजीत सिंह घाटगे यांनी शरद पवार यांच्या राष्ट्रवादीमध्ये प्रवेश केला होता. अनेक दिवसांपासून समरजीत घाटगे यांच्या भाजप घरवापसीच्या चर्चा रंगल्या होत्या. अखेर राष्ट्रवादी काँग्रेस शरद पवार पक्षाला सोडचिठ्ठी देत समरजीत घाटगे हे येत्या ८ एप्रिल रोजी मुंबईत भाजपमध्ये प्रवेश करणार आहेत.

भापचे प्रदेशाध्यक्ष रवींद्र चव्हाण यांच्या उपस्थितीत घाटगे यांचा पक्षप्रवेश होणार असल्याचं समोर येत आहे. घाटगे यांनी महायुतीकडून राष्ट्रवादी काँग्रेसचे नेते हसन मुश्रीफ यांच्याविरोधात निवडणूक लढवली होती. मात्र आता हसन मुश्रीफफ आणि समरजीत घाटगे दोघेही एकत्र आल्याने नव्या चर्चांना उधाण आले आहे.

काही दिवसांपूर्वीच घाटगे यांनी भाजप कार्यालयात चंद्रकांत पाटील यांची भेट घेतल्याचंही पाहायला मिळालं. तसेच त्यांनी भाजपच्या विविध बैठकांना उपस्थिती देखील लावली होती. दरम्यान त्यांच्या या पक्ष प्रवेशाने कोल्हापुरातील राजकारणाला नवे वळण मिळाले असून शरद पवार गटातील एका बड्या नेत्याने साथ सोडल्याने हा राष्ट्रवादीसाठी मोठा धक्का असल्याचे म्हटले जात आहे.