Amol Kolhe News : शिरुर लोकसभेच्या जागेवरुन राष्ट्रवादीत रस्सीखेच सुरु असताना राष्ट्रवादीचे विद्यमान खासदार अमोल कोल्हे यांनी मोठं वक्तव्य केलं आहे. अमोल कोल्हे यांनी राष्ट्रवादीच्या आढावा बैठकीनंतर माध्यमांशी बोलताना आपल्या कामाचा लेखाजोखा मांडला.

अमोल कोल्हे यांनी म्हटलं की, ‘मी ज्यावेळी 2019 मध्ये लोकसभा निवडणूक लढवली होती, त्यावेळी बैलगाडा शर्यत सुरु करणे, पुणे-नाशिक महामार्गावरील वाहतूक कोंडी सोडवणे आणि पुणे नाशिक रेल्वेचा प्रश्न सोडवण्याचं आश्वासन दिलं होतं. चार वर्षात बैलगाडा शर्यत आणि पुणे-नाशिक महामार्गावरील वाहतूक कोंडी हे प्रश्न पूर्णपणे सुटले आहेत.’ (Latest Marathi News)

तर पुणे-नाशिक रेल्वेचा प्रश्न आजवर आश्वासनांमध्ये होता, तो भूसंपादन ते कॅबिनेट मान्यतेपर्यंत पोहोचला आहे. हा संपूर्ण आढावा शरद पवार साहेबांसमोर मांडला. यापुढील काळातही जोमाने काम करण्याच्या सूचना पवार साहेबांनी दिल्या आहेत, असं अमोल कोल्हेंनी सांगितलं.

लोकसभा उमेदवारीबाबत आता अंतिम निर्णय पक्ष घेईल. तसेच साहेब सांगतील ते धोरण आणि बांधतील ते तोरण असा पुनरुच्चारही अमोल कोल्हे यांनी केला. (Maharashtra Political News)

पुन्हा येईल याची भीती वाटते

राजकारण बाजूला ठेवून कलाकार म्हणून अनेक राजकीय मंडळीशी भेट होत असते. त्यामुळे याबाबत कुणीही अकारण चर्चा करु नये. मी पुन्हा येईल म्हणायला आता भीती वाटते. त्यामुळे पवार साहेब सांगतील तो आदेश मान्य असेल, असंही अमोल कोल्हे यांनी म्हटलं.

अजित पवार म्हणाले...

अमोल कोल्हे आणि शिरुर लोकसभा मतदारसंघाबाबत आम्ही सर्व नेते बैठक घेऊन योग्य मार्ग काढू. तुम्ही काळजी करु नका, असं राष्ट्रवादीचे नेते अजित पवार यांनी म्हटलं आहे.