नवी मुंबई : दहावी, बारावी बोर्डाच्या कारभाराचे वाभाडे नेहमीच काढले जातात. त्यात आणखी एका घटनेची भर पडलीये. बारावीच्या उत्तरपत्रिका चक्क रस्त्यावर आढळल्या आहेत. नवी मुंबईमधील कामोठे येथे रस्त्याशेजारी असलेल्या भूखंडावर १२ वी कॉमर्सच्या बुक किपिंग या विषयाच्या उत्तरपत्रिका सापडल्याने खळबळ उडाली आहे. विद्यार्थ्यांच्या भवितव्याशी खेळ सुरु असल्यानं संताप व्यक्त होतोय.

मनसे कार्यकर्त्यांच्या ही बाब लक्षात आल्यानंतर त्यांनी सर्व उत्तर पत्रिका कामोठे पोलीस ठाण्यात जमा केल्या. पेपर तपासणी करणाऱ्या शिक्षकाकडून हा प्रकार झाल्याचं उघड झालंय. शिक्षक दुचाकीवर जात असताना गाडीवरून २५ उत्तरपत्रिकांचा एक गठ्ठा खाली पडला होता. या गठ्ठ्यामधील काही पेपर रस्त्यावर पडले मनसे कार्यकर्त्यांच्या जागरूकतेने हा प्रकार लक्षात आला. ही धक्कादायक घटना कोकण विभागीय शिक्षण मंडळाला कळवण्यात आली. हे पेपर खारघरमधील एका परीक्षा केंद्रातील आहेत. परीक्षा केंद्र अधिकाऱ्यांनी पोलीस ठाण्यातून उत्तरपत्रिका ताब्यात घेतल्या आहेत.

एकीकडे बोर्डाच्या कॉपी मुक्त अभियानाचा फज्जा उडाला आहे. तर दुसरीकडे विद्यार्थ्याच्या उत्तरपत्रिका चक्क रस्त्यावर सापडल्या आहेत. बारावीची परीक्षा विदयार्थ्यांच्या आयुष्याची दिशा ठरवत असते. विद्यार्थ्यांनी वर्षंभर केलेल्या मेहनतीचे पेपर अशा प्रकारे रस्त्यावर टाकले जातं असतील तर विद्यार्थ्याच्या भवितव्याशी केलेला हा खेळ आहे. आता याची तरी जबाबदारी शिक्षण मंडळ घेणार का?